Paradise timi bia hi Judah mi hna Babilon ramah kum 70 sal an tân hnu ah an caah salluatnâk darkhîng a tumpiaktu Persia Siangpahrâng pa Pangpar dûm min a si i a sullam cu ‘cân khat chung dinhnâk hmun’ tinâk a si.
Cu dûm (paradise) ah cun a ngeitu siangpahrâng pa nih a duhpiak mi a hawikawm țha kha a kalpi tawn hna i cu dûm pangpar hna ai dawhnâk nih an lungthin thabâtnâk le lungretheihnâk chungin cân tawite chung kha dinhnâk a pek tawn hna caah ‘cân khat chung dinhnâk’ (paradise) tiah ti a si.
Jesuh nih a pawngah an khenhchih mi misual pa sinah, “Biatak tein kan chimh. Ni hin ah Paradise ah Ka sinah na um lai,” tiah a ti tik ah Persia siangpahrâng pa dûm ah kan kal lai i cuka ah kan din lai tinâk a si hnga maw? Sinaisai hlah.
Persia siangpahrâng pa ngeih mi dûm nâk in Sertu Pathian ngeihmi dûm cu a let tampi in ai dawh deuh i dinhnâk hmun tak tak a si. Cu Pathian dûm Paradise cu khuazeiahdah a um?
Paul nih, cu dûm (paradise) cu,”Van thum nâk tiah a ti.”Cupa cu van thumnâk ah khin lak (cawi) a si….Paradise ah lak choh (cawi) a sining le… (mirang Baibal tam bik nih ‘caught up’ tiah an ti dih) 2Kor.12:2-4
Van khatnâk cu vate le vanlawng an zuannâk vanrâng hi a si. Hramthawknâk (Genesis) 1:6-8. Van hnihnâk cu nika le thlapa le arfi hna umnâk khi a si. Sâm 8:3. Vanthumnâk cu Pathian umnâk vancung khua khi a si. Mathai 6:9
“Van cung khua i a um mi kan Pa” tiah kan ti tawn bangin. Cucaah thoțhân Jesuh nih van a kai hnu ah “Pathian Paradise” tiah lamkaltu Johan sin ah a rak chim. Biaphuan 2:7
Cucaah Jesuh nih a pawngah an khenhchih mi misual pa sin ah, ‘ni hin ah paradise ah ka sinah na um lai’ tiah a timi Paradise cu Pathian umnâk vancung khua a si caah ‘Pathian Paradise’ tiah ti a si.
Persia siangpahrâng pa paradise cu cân khat chung dinhnâk hmun a si. Sihmanhsehlaw Pathian Paradise cu taksa in a thi mi zûmtu thlarau zungzal dinhnâk hmun a si. Biaphuan 6:9-11