“ Pale Ni” a thawktu cu America ram, Spokane khuami, Mrs. John Bruce Dood an timi nu a si. Amin taktak cu Sonora Louise Smart Dood ti a si. Amah cu 1909, May thla zarh 2nk ah hringtu nule ni ah aa pum i Pastor pa nih hringtu nule dawtnak kong a chimmi kha a theih tikah hringtu a pa (William Jackson Smart) dawtnak zong kha a hun thei than.

A nu nih an hmet lio tein a thih taak hna i a pa nih a hmeihpi hna. An unau rual 6 lakah amah te lawng nu a si. A nu a ngaih chel ahcun a celh tawn lo. Asinain a pa nih Khrihfa ziaza dawh in a thanter hna. Nu vanhai loin a zohkhenh hna. Voikhat cu khuasik tlak lio horha lakah Sonora nih cun a thi cangmi a nu cu, ka dong lai inn ah a tin bal lo a ti i, “ka nu, ka nu” tiah a au riahmah i horha lakah cun a tli thliahmah. Cu nih cun a pa thinlung a kuaiter tuk.

Sonora Lowise Smart cu a hung upat hnu zongah a nu zuun cu a ngaituk tawn. Voikhat cu biakinn aa pumh lio ah Pastor pa thawngtha chimmi chungin nule dawtnak le pale dawtnak cu a cuaichunh tikah a lung a suk ngaingai. A pa nih an unau rualtein a dawt ning hna kha a ruat i ka pa hi hmaizah upat pek awk a tlak, upat pek ding hrimhrim a si tiah a lung ah a hung chuak.

Cu tikah kum 1909 ah an Khrihfabu, bukip fonh Chairman a simi Rev. Conrad sinah ca a hei tialmi cu hringtu pale upat peknak tuah ding le tuah nicaan zong tial chih in a kuat. Cu a cakuat cu bukip Khrihfabu upa pawl meeting ah an hnatlakpi i 1909 kum, January thla zarh 3nk cu “Pale upat pek ni” tiah Washington State,

Spokane khua ah 1nk an rak tuah. Cu ni ahcun pale a nung rihmi cu Rose par a senmi an tonh hna i, a pa a thi cangmi cu Rose par a raangmi an tonh hna. Hringtu pale upat peknak cu an tuah tikah Sonora Louise Smart Dood sinah mitampi nih “na lung chungah zeikhidah na saduhthah le naa lunghmuihmi a si?” tiah bia an hal. A lehmi cu “hringtu pa ni ah innchungkhar dihlak ningin biakinn ah i pumh ii, pale laksawng peknak le duhmi bia siaherh chimnak caan ngeih khawh cio cu ka duh bikmi a si” a rak ti.

Cuticun hringtu pale upat peknak ni cu hmunkip ah anmah caan remning cio in an tuah tikah, Khrihfabu kip ii hruaitu upa hna tonnak le biakhiahnak in June zarh 3nk ah aa ruang tein tuah siseh an rak ti.
Calaknak: Olive Baptist Church, Hakha, Chin State

By admin

Leave a Reply

Your email address will not be published. Required fields are marked *