Kum 80 a si cang mi tarpa cu an mileng khaan i sofa cung ah a fapa he an ṭhu. A fapa cu kum 45 a si i cathiam le cawnnak sang a ngei mi a si. Ruahlopi khin an thlalang-awng ah lang-ak pakhat a rak i fu.
A pa: Mah khi zeidah a si?
A fapa: Lang-ak a si ka pa!
Tlawmpal hnuah a pa nih a fapa cu a hal ṭhan.
A pa: Mah khi zeidah a si?
A fapa: Ka pa, atute ah pei lang-ak a si kan ti kha!
Caan tlawmpal a liam hnuah a pa nih a vun hal ṭhan i a fapa cu a thin a hung, a ing a puang i a pa cu awhrang ngai in a leh.
A pa: Mah khi zeidah a si?
A fapa: Lang-ak, lang-ak!
A pa nih cun a voi 4 nak a hal ṭhan
A pa: Mah khi zeidah a si?
A fapa: Zeiruangah dah mah biahalnak cu na ka hal lengmang ee, voi tampi kan chimh cang ko ṭung. Lang-ak a si kan ti lengmang cu, mah hmanh cu maw naa fian khawh lo?
A pa cu a tho i ihkhan ah a va lut, tlawmpal ah a hlun ngai cang mi a diary he a rak chuak ṭhan. A diary cu a vun kau i a fapa cu a relter. A hmasabik cahmai ah hitihin aa ṭial.
“Nihin cu kum 3 a si mi ka fapa he sofa cung ah kan ṭhu i culioah thlalang-awng ah lang-ak pakhat a rak i fu. Ka fapa nih cun mah khi zeidah a si tiah voi 23 a ka hal i lang-ak a si tiah voi 23 ka leh. Voikhat a ka hal tinte kaa lawm tuk i ka fapa cu ka kuh, ka hnamh. A thinlung a thianghlim tuk mi ka fapa cungah ka thin a hung lo i ka ing zong a puang fawn lo”.
A fapa nih kum 3 a si lioah mah khi zeidah a si tiah a pa cu voi 23 a hal i a hal zat in a pa nih hmaipanh tein a leh. Asinain pa nih mah khi zeidah a si tiah voi 4 a hal i a fapa cu a thin a hung.
Na nu le na pa an hung upat i a kumkhua a tam tikah zeirello phun in um hna hlah, thilrit zongin ruat hna hlah. Bianem le biadawh in chawnbia hna law an hmai ah tangdor tein nun i zuam.
Atu dirhmun na phak khawh nakdingah nilin le ruahsur tampi tuar in lamchuk lamcho an zawh kha philh hlah.The father with his son and a crow timi tuanbia ka leh mi a si. Salai LIAN