Dawtnak Deu. Voikhat cu nupa hna saram chiahnak hmun an leng. Kuttlaih bu khin saram pakhat hnu pakhat an bih hna. Chun ni king, Ṯhuro awnh le Huho awnh thawng lunglen hruai le hnemtu vanhai saram an hmuh ah an zaangram tuk. Khatlei tiva ral an hei pet.
Tlimno rawn, thing hmawngṯhiam lo ram, aho hmuh lo ram ah aa kilh bang nuam ngai in a tlonglen mi Zawng nupa an hmuh hna. An i hmanh zawn, Hrik an i zoh zawn, an i dai zawn, aho vanhai lo khin vawleipi hi anmah ram ko a hluan. A nupi nih a thawh i, “Kan pa! Zawng nupa khi zoh hna hmanh. Zeitluk in an i dawt. Duh an nun khawh ning,” a ti.
Zei bia chim lem lo khin Chiandeih umnak ah a kalpi. Zawng nupa bang an ti lo, hmunkhat ngaingai zong ah tlongleng lem lo khin aa rem lo bang a kine veve an bok. Nu ṯheu cu, “Kan pa! Chiandeih hna nupa hi an zei lung dah tluang hnga lo? Dawtnak a ngei lo mi hna nupa an si. A langhlat in a meet rumro in an i meet hnga, mibonlo an si, a ti.
An pa nih a thawh i, “A nu hmai ah khin lung pum hei chep law zeidah cang na hngalh lai a ti. Lung pum cu a hei cheh i Chiandeih pa hrum thawng cu mithlakok a baar. A dawt mi an nu fahnak a pe mi cung ah hohaling in thlehbauh viar hna a duh. Mipa nih an nu a thawh i, “Zawng hna nupa hmai ah lung hei chap ṯhan tuah, a ti.
Aa kuprek cuahmah mi Zawng nupa hmai lung van cheh cu i zawnruah zong a um lo. Phirpahliklo khin a perchoi i thingkung ah lo diam a kaitak. Zei biachim awk hngal lo khin an nu hmai a dul. Lenglang mi hmuh zohdawh menmen ah aa daw tuk um in um, aa duh tuk um in um.
Chunglei dawt kuang a reu mi thinlung kan hmuh lo mi a um tihi hngalh a hau. Nihin Laimi nuva karkhuah kar ah a cang mi tampi a um. An riahruun ah a cang mi chungkhar zawtnak leng lang lo a um bantukin runinn toi ah kan mizia a si lo mi mi zohdawhnak sawh ah kan vahpi mi a tam.
Phun dang in kan chim ahcun, chungkhar ah nuva kawp-khat um in um loin, ngeihchiah zong i hrawmpi lo, hmuh mi le hmannak zong i hngalhpi lo, lungthu kua pakhat ah rawlbel zong a khingṯi in dinei zong aa hrawm lo mi, hmunkhat hmanh ah it lo in mi dang mithmuh sawhsawh lawng ah nuva a si mi an tampi.
Chungkhar buaibainak hi aa khat dih lai lo; kan tong mi harsatnak le fahnak zong aa khat dih lai lo. Sinain kan duh mi aa khat bik mi pakhat cu “dawtnak” a si. Kan nupile zong mifanu dawt, kan pasalle zong mifapa dawt.
Harnak le fahnak, siṯhatnak le zawtfahnak lak zong ah, i dirkamhpi ding le chantlung chandongh tiang kutsih in khuasak ding duhpiak cio mi kan si. Sinain Cenghngia bang Tuuhmul i aih in ‘dawtnak deu’ he hmailei mah karkalak hui duhnak lungput ngei zong cu kan rak um ve tawn.
An sin/cung ah kan lung a hmunh khawh lo caah mitpar kan ngei; harnak nih a kan phak tikah zawnruahnak le thlachiatruahnak a um kho lo. Cucaah harnak caan ah zamtak a hmang mi dawtu cu “Zawng” bantuk an si.
Mi hmuhnak lawng ah dawt i chungkhar taktak ah dawtnak ngeih lo. Taktak kan ti ahcun, dawtnak hi bia in a si lo, tuahsernak tu in a lang mi a si. Cucaah na dawt mi kha Zawng bantukin muaitham hlah, Chiandeih bantuk tu in rungveng.