Aa daw ngai mi nuva thuah khat an um. Kum zeimawzat chung fa ngei kho lo in an um hnu ah fapa duhnungte an ngeih. An i lawm tuk. An mit laifan ah an chiah. Kum 11 umṯi hnu fa ngeih cu lawmh lo awk zong ṯha hlah. Kum le caan sin ah an fate zong a hung ṯhang iahmah. Kum hnih tluk a ti ah khin cun biatakte zohkhenh a hau, aruang a sawhkalh tuk.
Voikhat zing cu an pa zung rian kal aa hnawhhnam ngai. A fapa lente celhnak kam ah siivai ngei sii-dur a chin hon cia in a um kha a hmuh. Hnawhhnawh hnamhnam rian kal kan ti cu, an nu kha sii dur khi hei la law a chin chin. Pate banh khawh lonak thlanghrawl ah chia te, tiah a chimhtak i a rannak in rian ah a kal.
Aho bawmchantu ngeilo nu bik zong coka rian ah aa za khim. Umkheng ṯawl, fimtawl le thianhlimh a lim hnu ceo in an pa nih a chimhtak mi a philh diam a hngalh ṯhan. Zei hngal lo an fapa zong amah tiam in a rak i tiam. Sii-vai ngei sii cu a char zau i a ei.
Kum upa nih ei mi sii ngakchia kumno tuk nih a ei tikah lungfim lo in a hung um. A dir pathluang in aa ngal i a buanbara a tawh. Elaw ka fa! tiah a nu nih a hun zuanhnawh i sii-inn ah a tlikpi. Vawlei siibawi nih a rianrannak in a nun chanhchuah an zalh, nain a tlai tuk cang. Fa fangkhatte cu a nun ṯanglum cung ah a liam.
Phungthluk hmanh ah “Fahniang thih le ngalcar khawn” ti si bang, an fa ngeihchun thih cu a tuar in a tuar kho lo. Fahniang thih lungfah dang khat, an pa fial mi tuah lo daithlan ruang i fahniang nunnak paam pasal hmai hmuh lai a ruah ah amah le mah i thah hmanh a ngamh.
Zeitin hme kan pa hmai ka hmuh ngam lai? Sii dur khi van fim ta, tiah ralrin a ka pek ko ṯung, ka tuah lo ruangah kan fa thihnak a phak phah. Kan fa hi keimah thah a si ko ti’n mitthli he ṯah-hlah lawh pah khin a ṯah.
Ngeihchun hrinhniang thih thawng a theih in amah le mah hmanh hngal lo khin an pa zong a choi colh. Nunnak a ngei ti lo mi a fa pom bu in a nu nih a rak ṯah len ko a hmuh. “Ka dawt kan umpi” ti vial zei dang bia a chim kho lo. Mifanau a dang khar, a hnarno ruh a ṯam i i sum lo khin thangpi in a hung ṯap. A mawh loh!
Pehsauh awk zong a ṯha ti lo mi an fapa nunnak a dih cang. Ṯah in auh len zong ah a nung ṯhan ding a si ti lo. An fa thihnak kong ah nangmah mawh/palh deuh a si ti i puh awk ṯha hlah. A pa nih a hmuh lio te khan rak fim ta sehlaw hi thil a cang hnga lo. An pa nih a chimh cangka in an nu nih rak fim sehlaw cu ṯhiam. Aho mawhpuh awk ṯha hlah.
Chanchung an hmuh khawh ṯhan ti lo ding fapa thihnak nih nun chirnak khur ah a luhpi hna. Holhnak hmanh ah, “cawhnuk tle cang mi cu ruh nolh awk ṯha hlah,” ti si bang, khirh awk zong a ṯha ti lo. Cuticun an dawt tuk mi le zohzun tuk mi an fapa cu lungfah celh lo le sian lo ṯaang cum in an vui.
Caan tampi cu chungkhar khuasaknak ah siseh, Khrihfabu i ṯhithruainak ah siseh, bu (organisation) cawlcanghnak ah siseh, nangmah ruangah, anih ruangah ti’n khat le mawh kan i puh, kan i aukhok. Ṯhatnak kong ah cun ‘anih thawngin’ ti nakin ‘keimah thawngin’ ti a tam deuh fawn. Mah kha tang ah van i ṯhumh i palhnak cohlan kan i harh.
Keimah thiamlo, keimah santlaihlo ruang, keimah daithlan ruangah a cang kan ti duh lo. Mah palhnak i cohlan khawh lo hi mah le mah i tei khawh lo a si. Ngaihthiamnak kan ti mi hi palhnak a um ruangah a si thlu lo, ka palh tiah cohlan khawhnak a rak um ruang tu ah a si.
Chungkhar nuam kan rak ti mi zong hi ngeihchiah in rum a rak si lem lo. Theihthiamnak le dawtnak nih a kalpi chih mi chungkhar, nu rian le pa rian dang lem lo in tuah awk a si mi paoh aa manh nih tuanṯuan kanh i ceennennak le uhṯanhnak a um lo mi chungkhar tu hi a rak nuam deuh.
Na tuah awk a si, na rian a si ti in alhnialnak a um awk a si lo. Chungkhar kan si caah kan rian dih a si. Keimah lawngte nih ka tuah ti phun in tuah awk a um ko mi nganh hramhram awk zong a si hlei lo.
Mi dang rinh ruangah a cang kho mi thil kan hmuh lo mi phen ah a um peng. Cun nun chimhhrin hi dawt a si, sinain mawh puh lawng bawh cu miphung a si lo. Cucaah palhnak cohlan zia thiam in mi dang sualpalhnak cung ah lungawi lo ding. Carson Twintwin