An sorkar chanchinbuin, ‘khawvela rlthuam chak ber’ tia an sawi, tuihnuailawng atanga kah chhuah theih chi missile thar chu North Korea chuan a tlangzarh.An hruaitu, Kim Jong-un-an hun a hmanpuina sipai parade-ah an ralthuam neih chi hrang hrangte an pho chhuak.
Hetianga North Korea-in an sipai chakna a pho chhuah hi United States president atana Joe Biden-a lak luh a nih hma lawka neih a ni.An neih ngaih zen zen loh political meeting an neih hnuhnung berah Kim-a hian US chu an ram ‘hmelma lian ber’ tiin a sawi.North Korean sorkar chanchinbuin thlalak a tihchhuahah chuana missile dum leh var, lian tak tak pali chu mipuiin lawm takin an lo dawngsawng.
An hruaitupa ber, Kim-a pawh savun kawrchung leh ramsa hmula siam thawmhnaw inbelin, Pyongyang-a Kim Il Sung Square-a an sipai, an hmanrua, laipui leh an tank parade hi hlim takin a thlir.Korean Central News Agency chuan, “Khawvela ralthuam chak ber, tuihnuailawng atanga kah chhuah chi ballistic missile chu a lo lang a, he thil chak tak hian sipaite tha a tichak ngei ang,” tiin a tar lang.
Kar hmasaa kum nga dana neih thin, rorel lai, Workers’ Party intawh khawmah Kim-a hian North Korea-in nuclear ralthuam leh sipai a neih chu a tihlen tur thu a sawi tawh thin.