Sagaing ramthen, Salingyi peng ah pa 3 ruak an hmuh hnu ni hnih chung ah meithal kahnak in a thimi 7 an si cang tiah khuami hna sin in theih a si.
Salingyi peng, YeKha( ရေခါး) khua pawng ah ruak pahnih le Salingyi khua pawng ah ruak pakhat hmuh ṭhan a si tiah khuami pakhat nih a chim.
Salingyi peng chung khuate hna ah rallam a sialmi SAC ralkap hna khuachung an hung luh hnu April 26, zingka ah atu bantukin miruak kan hmuh ṭhan hna hi a si tiah Salingyi Border Task Force-SBTF in ṭuanvo ngeitu pakhat nih Thanlwin Khet ah a chim.
“April 25, zanlei hrawng ah a cangmi si in an thahmi hna cu lunggyi an i fenh, Salingyi khuami cu an si lo, Monywa lei in an tlaihmi hna chung in an si kho men tiah” tiah a chim.
Pale peng leiah rallam a sial ding Comando ralkap 30 hrawng an si i atu Salingyi peng Nyuangpingyi palik sakhan chung ah SAC ralkap tel in an zapi thazaang 100 hrawng an si lai tiah a chim chih.
SAC ralkap hna cu Salingyi peng chung ah rallam an sial hnu April 25 lio zong ah Myaing ah an tlaihmi pakhat telh in Monywa ah an tlaihmi hna 3 he an kah hna tiah an ruak hmutu pakhat nih Thanlwin Khet ah a chim.
Salingyi peng chung ah SAC ralkap nih rallam an sial caah khua 15 in mipi sing 10 leng nih ral an hrial, cheukhat cu an umnak khua lei ah an kir kho rih lo tiah khuami hna nih an chim.TCP