Mathai 12:40 ah ‘Jona cu ngapi paw chungah ni thum le zan thum a um bantuk khan Mi Fapa zong hi ni thum le zan thum lei chung ah a um ve lai’ tiah Jesuh nih a rak chimmi kha CAWNPIAKNÂK a si lo.
Jesuh ralchanhtu Farasih hna nih, ‘Cawnpiaktu, na sin in hmelchunhnâk hmuh kan duh ko,’ tiah an rak timi lehnâk ah Jesuh nih a chim mi a si. Mt.12:38
Timh ciammam in cawnpiak mi or cawnpiaknâk a si lo. A sullam cu Farasih hna nih kha bia kha rak hal hna hlah seh law ‘ni thum le zan thum’ timi bia kha Jesuh nih a chim hrim hrim lai lo.
Zeicatiah biahalmi lehnâk si loin Jesuh nih timh ciammam tein a thih lainâk le a thawhțhan lai nâk kong kha voi thum kheng te a cawnpiak mi ah ‘ni thum’ ti lawng a chim i ‘zan thum’ timi a chim bal lo.Mt.16:21. Mt. 17:23. Mt. 20:19
Cucaah Paul nih. ‘Cathiang ning tein ni thum ni ah a tho țhan’ tiah a ti. 1Kor.15:4. A thih ni (ni nga ni) ni khat, Thlân ah a um ni (sabbath) ni ni hnih A thawhțhan ni (Sunday) ni ni thum. A thih ni le a thawhțhan ni hna cu ni khat a tlin țung lo, tiah an ti hlah maw?
A lehnâk cu Baibal nih voi khat te hmanh ‘ ni khat tling’ ti mi biafang a hmang bal lo. A thih ni zong ‘ni’ Thlân ah a um ni zong ‘ni’ A thawhțhan ni zong ‘ni’ Chap ding le zuh ding a um lo. Cucaah Jesuh cu ni nga ni ah a thi i Sunday ni ah a thoțhan ti hi zungzal in a hmun mi Pathian bia Baibal cawnpiak ning a si. Evan Rualuk