Ralhrang nih Khampat civil mi pakhat an thah. Hi an thahmi hi khawika sang minung le a min cu fiang in theih asi rih lo, asinain No 2 Mizo asi lai zumh asi. Ramtang ah a zaam ve ko nain a inn siaherh ah a inn va veh dingin a kal lio ah ralhrang he an I tong I ralhrang kut in ti bantuk in a thih hi asi.
Khampat (Kanan) khua pawngte, India ramchung asimi Samtal ah Kanan khuami hna cu an va zaam i Samtal (Thado) pawl nih an rak thawl hna le tuhi zaamnak ngeiloin zeitiawk theih lo ah khua ah an hungkir than ti asi.
Khampat caah nan thlacampinak kan herh ko. Zeidah kan lawh lai kan i hngalh kho lo nan thlacamnak in rak kan philh hrimhrim hlah u. Khampat Khuami 1,000 Leng Cu Kalaymyo Ah An Zaam
SAC ralkap le PDF kar kahdohnak a zual tuknak Sagaing ramṭhen, Tamu pengkomh Khampat khuami 1,000 leng cu Kalaymyo ah ralhrial in an zaam, tiah ralhrial bawmchantu hna nih an chim.
Kahdohnak ruangah Khampat khuami hna cu India ram lei zong ah a zaammi an um ve i Kalaymyo khrihfa Biakinn le tualchung mi inn ah aa dormi zong an um, tiah ralhrial bawmchantu hna nih cun an chim.
“Inn 500 leng a umnak Khampat khuapi ah ahohmanh an um ti lo. Ralhrial mi hna ca ah puan cu chim lo ihnak hmanh a um lo. Furpi lio a si caah fikfa zong an tam i, khiangthawng zong kan pe kho hna lo, eidin tirawl lawng kan pek khawh hna,” tiah ralhrial bawmchantu hna nih an chim.
July 23 in Khampat ah SAC ralkap le PDF kar kahdohnak a zual i July 25 zinglei zong ah SAC ralkap nih hriamngan voi tam tuk an kah. Khampat khua ah a taang rihmi hna zong ralhrial bawmchantu hna nih an va chanh hna i ramlak ah an zaam, tiah theih a si.
Khampat khuami ralhrial in a zaammi hna kong he pehtlai in SAC nih zeihmanh thawng an thanhmi a um rih lo pinah RFA nih SAC chimphuannak nawlngeitu Zaw Min Htun cu phone in pehtlaihnak an tuah ko nain a cohlang lo, tiah RFA nih an langhter.The Chin Post