Mocha Thlichia Nih Sittwe Peng Ah Minung 400 Leng Nunnak Laak!Mocha thlichia nih Rakhine ramkulh, Sittwe peng Muslim hna umnak camp a den ruangah minung 400 leng nunnak a liam i, tam ngai an tlau, tiah cazin latu pakhat nih a chim. Cazin latu nih cun, “May 15 cazin kan laak ningin minung 400 leng nunnak a liam. Nihin May 16 zinglei ah nunnak a liammi zong an karh. Nunnak a liam mi hi ngakchia le kum upa deuh an si,” tiah a chim.

Nunnak a liammi hna cu an vui colh hna i a tlaumi zong kawl cuahmah an si, tiah theih a si. Mochia thlichia a hran hlan ah rili he aa naihnak hmunah a ummi hna cu bawmchantu phu le SAC ralkap nih i ṭhial chung dingin ralrinnak an rak pek ko hna nain nawl an ngai lo, tiah ralhrial camp ah a ummi hna nih an chim. Thlichia ruangah a thi mi tam biknak hi Sittwe peng Dapaing, Ungtawgyi, Basala, Sanpiah, Basala Camp, Bawduba le Beda khua in an si i, a za leng an tlau, tiah mi bawmhchanhnak camp ah a ummi hna nih an chim. Thlichia ruangah hin Sittwe telh in Rakhine ramkulh peng 7 ah inn, zung, sii-inn, sii-khan, biakinn le sianginn tam ngai an rawk, tiah theih a si.

Thlichia Ruang Ah Sittwe Khuapi Zatuak Sawmriat(80%) Leng A Rawk! Rakhine ramkulh ah fak ngai in a hrangmi Mocha thlichia ruangah Sittwe khuachung inn zatuak sawmriat(80%) leng an rawk, tiah tualchung mi pakhat nih a chim. Tualchung mi pakhat nih cun, “Sittwe khuachung ah hin tualchung mi hna umnak inn lawng si loin sianginn tibantuk zong tam ngai an rawk.

Cu pin ah thingkung le electric tung hna zong an pur i, inn tampi cu nawncek nih a khuh dih hna. Khuachung inn zatuak 80 leng hrawng hi a rawk i remh ding a tam hringhran,” tiah a chim.
Thlichia ruang ah hin nunnak a liam mi zong tam ngai an um, tiah theih a si. Atu ahcun mah umnak chuahtak in hmundang i aa dor mi zong an umnak hmun ah an kir cang hna i, bawmchantu phu hna zong nih an zuanhnawh hna, tiah theih a si.

Yinmarbin Le Salin Peng Ah Tilian Nih Cinthlaknak Dum Acres 20,000 Leng A Phum! Sagaing ramṭhen, Yinmarbin le Magway ramṭhen Salin peng ah tiva ti a lian i, cinthlaknak dum acres 20,000 leng ti nih a phum, tiah theih a si. May 14 ah khan Mocha thlichia a hran pinah ruah faak ngai in a sur caah ti a lian i, Myoyama tiva pawngkam a ummi khuate tiang ti a lian i, cinthlaknak dum acres 15,000 leng an rawk, tiah Khit Thit Media nih a ṭial.

Myoyama tiva pawngkam hrawng a ummi khuate hna cu tilian ruangah umnak hmun an i ṭhial hna i an cinthlakmi vialte zong an rawk dih, tiah theih a si. Cu bantuk ṭhiam in Magway ramṭhen, Salin peng Kyunyin khuakomh khuate 5 leng cu thlichia le ruah nih a den ve caah leikuang acres 1,000 hrawng le cinthlaknak dum tam ngai a rawk, tiah tualchung mi hna nih an chim.

By admin

Leave a Reply

Your email address will not be published. Required fields are marked *