Shan Ram Thlanglei Ralhraang Sakhaan Pakhat An Laak. Shan ram thlanglei Moebe khua Set-daw pura tlangbo cung um IB 518 battalion sakhaan cu 11.11 operation aa thok ni in kah an thok i November 15 ah tlamtling tein an rak laak khawh.
Cu kahdoh nak i an laak mi meithal le kuanzen hna cu nihin ah NUG MoD nih an thanh hi a si. Hi kahdoh nak cu Shanram tactical 1 le 2 battalion,KNDF le PDF hna i bawm in an tuah mi kahdohnak a si tiah theih a si.
Tulio cu good news lawngte a ra i, thawngpang rel a nuam ngai. MAH ralhrang nih ground hmun tampi an sungh thluahmah. Mipi ralkap hmunhma a kau thluahmah. Ttan rual cu zeitluk indah hmual a ngeih timi cu mit hmuh, kut tawngh in a lang cuahmah ko.
Lungthin khat in ttangrual thiam a herh tuk lio caan ah, mah phu lawng ttanh pawl bia nan ialmi hmuh ah ngai a chia ko. Min Aung Hlaing order tang ah active ralkap a simi vaivuanh, CDM tuahter, zamter le hriamnam chiahter khawh cu, nem tein teinak phun khat a si.
Chin ram ah Ralhrang sakhan, lawnter, chuahter, hrawh in Chin ralkap nih hmunhma luah cu teinak nganpi a si rih fawn ko.
Tulio bantuk caan ah phu khat le phu khat ttangrual thiam a herh tuk lio caan ah, itthennak bia le hla, phu khat le phu khat iengtainak paoh cu hrial cio aa ttha.
Ram le miphun ka dawt nan itung i, lungrualnak sernak caah dawnkhantu, lungrualnak sernak phentu/block tu nan si ahcun, cucu ram le miphun dawt a si maw, timi zong ruat chih cio a ttha. Zasang Cinzah