KNLA Le Tualchung Hriamtlai Phufonh Nih Kawkareik Peng SAC Ralkap Sakhan Cu Hriamnam Tamlak He An Laak
Kawkareik peng Paingkalan khua pawng SAC ralkap sakhan cu KNLA le tualchung hriamtlai phufonh nih an lak pinah hriamnam tampi kan laak khawh, tiah KNU(Dooplaya District) nih nizaan September 15 ah a thanh.
Thailand-Myanmar ramri SAC ralkap Yetashaut sakhan cu KNLA battalion 18 le tualchung hriamtlai phufonh nih September 14, zinglei suimilam 7:55 in 8:20 tiang an kah i, minutes 25 chung ah kan laak khawh, tiah an thanh.
Kahdohnak chung ah SAC ralkap 9 an thi i, tualchung hriamtlai phufonh lei in ralkap pakhat nunnak a liam pinah 3 hliamhma an tuar, tiah an langhter.
Kahdohnak ah hriamnam an laak khawhmi hna cu MA-1 pakhat, MA-2 pahnih, MA-3 pakhat, MA-4 pahnih, RPG pakhat, 60mm pahnih, pistol 2, RPG -7 kuan zun 70, 81mm kuan zun 40, 60mm kuan zun 110, M-79 kuan zun 40, 5.56 kuan zun 2800, 7.62 kuan zun 800, bomb tibantuk le hriamnam dangdang tamlak an laak, tiah theih a si.
KNU hmunram chung ah SAC ralkap a thimi le hliamhma tuarmi an tam caah KNLA le tualchung hriamtlai phu sin ah aa fonhmi SAC ralkap zong an karh, tiah KNU (Dooplaya District ) nih cun an langhter.The Chin Post