Kani SAC Ralkap Sakhan Laak Kahdohnak Ah SAC Ralkap 20 Hrawng An Thi. Sagaing ramṭhen, Kani peng Monywa-Yakyi-Kalaywa lampi mengtung no.49 pawng ummi SAC ralkap hrambunh in an umnak Communication Tower sakhan cu tualchung hriamtlai phu nih luhhnawh in an kahdoh hna hnu ah an sakhan cu an hrawhpiak hna, hriamthil tam ngai zong an laak khawh tiah theih a si.
April 17, zinglei suimilam 7:00 SAC ralkap 30 hrawng an umnak sakhan cu tualchung hriamtlai phu nih an kahdoh hna, kahdohnak chung ah SAC ralkap ralbawi bukyi Twe Lin Htet telh in 6 hrawng an zaam tiah theih a si.
“SAC ralkap a zaammi chung ah tlaihmi zong an um, an umnak sakhan cu mipi ralkap nih an khanghpiak dih hna. Kahdohnak ngol lai ah vanlawng pahnih nih a hel hna” tiah tualchung hriamtlai phu hna he naihniam in ummi pakhat nih a chim.
Kaphnih kar i kahdohnak ah SAC ralkap lei in a thimi le hliamhna tuarmi hi 20 hrawng an si i helicopter 2 nih a rak laak hna. Kani tualchung hraimtlai phu lei in ralkap pakhat a nunnak a liam, hliamhma fak tuarmi ralkap pakhat telh in, ralkap 16 nih hliamhma an tuar tiah a chimchap.
SAC ralkap sakhan laak kahdohnak ah SAC ralkap sin in meithal zun 15 leng ah hriamthil tam ngai mipi ralkap nih an laak khawh. SAC ralkap hna cu KPDF-2, Yinmabin pengkomh battalion 1 le tualchung hriamtlai pahkahphah ṭangṭi phufonh nih an kahdoh hna.