Palik sakhan a hliammi an tam caah vanlei in kah a bawmh hna. Gangaw peng, Kan Kye khua I a ummi SAC palik sakhan an kah hna I a hliammi an tma ruang ah Vanlei in kahdohnak a vun bawm hna khuachung zong ah a kah chih kong khuami hna nih an chim.
March 31 zing sumilam 4 :00 am hrawng ah khan Gangaw peng PDF phu fonh hna nih Kan Kye khua I a ummi Palik sakhan cu an va kah hna hi a si. Sakhan an kah I a hliammi an tam hnu in SAC nih vanlei in Mi – 35 a vun thlah pinah Jet fighter zong voithum a phan, Mi – 35 in bomb voi hnih an thlak pinah Helicopter 2 in ralkap thazaang zong an chap fawn hna theih a si.
“Zaanlei suimilam 2 :00 pm tiang hi kahdohnak a pehzulh, a khawngmi zat cu fiang in theih a si lo, vanlei in kahdohnak a tuah ruang ah hin khuami hna inn pawl zong an kangh hna, cu hnu ah cun kahdohnak a dai, zeidah a can than lai cu chim khawh a si lo tiah PDF lei in rianngeitu pakhat nih cun a chim.
Zaan lei suimilam 5:00 pm hrawng zong ah khan Helicopter pakhat in thilri le thazaang a vun chap hna zong theih a si. Kan Kye Khua ah inn 2000 hrawng an um hna khuami hna cu an z ate tiawk in zing suimilam 4 :00 am khan a himnak ah an zaam hna. Hi kahdohnak ah hin kaphnih in a khawng mi le a hliammi an tam men lai tiah zumh a si.