Chin miphun nih Pau Dohthlennak (Spring Revolution) kan herh lo. Chin miphun nih Pengtlang Hriamtlai Phu (Tribal-based Armed Groups) kan herh lo, NUG-based Armed Groups zong kan herh lo.
Kan herhmi cu Miphun Ralkap (National Army) le Miphun Dohthlennak (National Revolution) hi a si.
CDF zong CNF/CNA ah aa hngatchan lomi le Kawl le NUG tu aa bochan deuhmi kan um sual ahcun kanmah le kanmah i zoh țhan caan a cu tuk cang.
Ram le miphun kan dawt taktak ko ahcun CNF/CNA ah i fonh le luh caan zong a cu fawn cang. Kawl le mirang nih kan ram hi an kan dirhpiak in an kan serpiak lai lo. Kan ram cu kanmah tein kan diarh le kan ser a hau.
Mah nih țuan loin midang bawmhnak lawng a hngakmi le aa bochanmi kan sinak/lungput kha hlonh ding a si cang.
Kannih cu Democracy ca lawng men ah ral a domi kan si lo i miphun le ram ca zongah ral a domi kan si hi kan i fian ko bu ah thuk piin ruah caan a cu. CNF/CNA hi miphun le ram caah a țuanmi party le ralkapbu cu an si ko.
Kan ram kanmah tein kan i uk khawhnak ding le Chin Cozah ser khawhnak ding ah a țuanmi an si ko. Ram a țhat hnu ah uknak lak le tlaih aa timmi zong an si fawn lo.
Kan thazaang dihlak in CNF/CNA hi dirkamh le thazaang pek hi kan miphun i kan rian ngan bik cu a si ko. Kan thlacamnak in siseh, kan chawva in siseh, kan mipum le kan fimthiamnak in siseh, kanmah le kan ti khawh tawk cio in kan i bungh dih caan a si.
Pengtlang hruainak phu kan ngeihmi hna hi cu CNF/CNA ca i Chinland Club ah chawva kan khawlhnak le kan thawhnak lawngah hman ding a si, mah zawn ah hin cun san a rak tlai tuk ve ko.
Ram hla (National Anthem) thim le sak caan a si rih lo. Tlang holh (Official Language, Common Language) thim caan zong a si rih lo.
Hla cu phuah ding bak a si; ca le holh zong cawisan ding a si ko. Independence kan hmuh tikah a credit a țha bikmi holh le hla nih hmunhma a lak te ko lai.
Vawlei cung ah ramttha bak kan timi US ram zong hi Native American pawl i an ram an chuh chommi hna a si cu kan hngal cio.
Kannih cu mi ram chuh ruah ah ral a domi zong kan si lo. Kan pupa hna nih an rak tlakmi kan ram lak țhan dingah ral a tumi kan si. A dikmi raldohnak a si.
A tanglei map hi British le Burma cozah nih an duh paoh in an kan rinpiakmi le an kan cheupiakmi Chin miphun pawl kan umnak ram area a si. Kan lung aa rual ahcun kan lak țhan khawh dihmi ram a si! A cung ca ka țialmi hna hi pumpak hmuh-ning le ruahnak an si. Salai Cung Lian