Mindat Ah Ralhraang Nih Khrihfa Biaknak Hruaitu 3 An Thah Hna, Ralhraang Kut In Khrihfa Biaknak Hruaitu 11 Nunnak Liam Cang
Central Lairam, Lawngtlai 2023 Chiapa 31: East Lairam thlanglei, Mindat nitlaklei sang ralhraang nawlpeknak in onmi Khrihfa Biakinn ralzaam riahbuk ah a ummi Pastor pakhat le Khrihfa upa pathum cu ralhraang nih Chiapa 16 an hraamhraam in an tlaih hna.
Mindat hrambunh ralhraang 274 Battalion in ralhraang pawl cu zu an ri i, Khrihfa biakinn, ralzaam riahbuk ah an i din, duhduh in Cycle nan hman tiah hramhram in an ti hna i, Biaknak hruaitu pawl cu an tlaih hna.
Hihi khuachung thilcang a si, hrem a tuarmi Khrihfa Biaknak hruaitu pakhat cu a luat, a hliamhma a fak, Mindat peng hmun pakhat ah thlop cuahmah lio a si. Mindat khuachung hrambunh 274 Battalion nih an tlaihmi hna Khrihfa Biaknak hruaitu hna hi an hreng hna lo caah ralhraang nih an thah hna lai tiah zumh a si.
Hihi Biaknak namneh a si lo, ralhraang thilsual tuah hraamhram a si, minung lungthin ken lo thiltuah a si, ralhraang cu biaknak a ngeilo mi minung an si” tiah CDF Mindat in tuanvo ngei pakhat nih a chim.
Tlaih a tongmi Biaknak hruaitu chungkhar hna cu ralhraang nih a voikhatnak ah biahalnak kan ngeih lio hna tiah an leh hna hnu Chiapa 26 ah chungkhar nih an hal than hna tikah an Batalion hmun ah an um lo kong theihfian a si.
Ralhraang nih tlaihkhihmi Biaknak hruaitu hna hi biahalnak men ruangah si lo in an hremnak hna ah an nunnak a liam tiah an zumh caah Mindat khuachung ummi zong nih ralhraang an thiltuah i fiang in an hrambonghnak hnga pehzulh in doh hna usi tiah Mindat peng, mizapi ukhruainak phu nih forhfialnak an ngeih.
Kawl ralhraang nih East Lairam chungah Khrihfa Biaknak hruaitu minung 11 an thah cang hna. Cun Khrihfa Biaknak inn 30 leng an hrawh i, Khrihfa Biaknak inn he aa pehtlaimi inn 30 leng zong ralhraang kut in an rawk. The Lairam Times