SAC ralkap nih cunglei thazaang biatak tein a hman cang caah khuate lei ummi hna cu thinphang dai loin an um. Zaanṭim mitkuh thawt lingcing zong ah Jet fighter a zuan ahcun himnak kawl in zaam a hau.
A tanglai hmanthlak hna hi Jet fighter a zuan poh ah nun himnak kawlin an i thuhnak/dupnak hmun a si. Hmanthlak kan rak taar mi hi a hmunhma le khua, fing le tlang ti bantuk fiang tein kan langhter mi a um lo.
SAC Jet fighter ruangah mipi nih zeitluk in dah harnak an ton timi kha langhter kan duh mi a si. Mipi himnak ding kong ah thinphan ding a um lo.
Thawngpang dang relchap-Shan Ramkulh, Kokang Hmunram Kahdohnak Ah SAC Ralkap 20 Leng An Thi
Shan ramkulh, Kokang hmunram ah Myanmar National Democratic Alliance Army(MNDAA) le SAC ralkap kar kahdohnak a chuak i, SAC ralkap 20 leng an thih pinah hriamnam le zen-kuan zeimawzat zong MNDAA lei nih an laak, tiah The Kokang nih an thanh.
June 1 ah Kokang hmunram chung ah rallam a sialmi SAC ralkap 70 leng cu MNDAA Brigade 511 nih June 4 le 5 ah an kah hna. June 4 zinglei kahdohnak ah SAC ralkap motor 1 a rawh leng ah ralkap 4 an thi. Cun, zanlei suimilam 1:00 ah kahdohnak a chuak ṭhan i, SAC ralkap 8 an thi ṭhan.
June 5 ah MNDAA le SAC ralkap pawl cu an i kap ṭhan i ralkap 16 an thih pinah tam ngai hliamhma an pu. MNDAA lei zong in hliamhma pumi an um ve, tiah theih a si.
MNDAA nih SAC ralkap seh meithal kuan 230, hriamngan kuan lung 3, bomb lung 1 telh in hriamnam le zen-kuan zeimawzat an laak, tiah Khit Thit Media nih a ṭial. TCP