Uknak Laak Hnu Karen Ramkulh Ah Tualchung Mi 440 Tluk An Nunnak Liam, SAC Ralkap 1600 Leng An Thi.
Karen ramkulh le Shan ramkulh thlanglei Moebyel, Pekhon peng chung ah SAC ralkap nih uknak an laak thawk in 2023, February thla dih tiang thla 25 chung ah tualchung mi 440 hrawng an nunnak a liam tiah PKPF nih March ni 1 ah cathanh a chuah.
Nunnak liammi hna chung ah SAC ralkap nih tlaih in thah a tongmi 309 le ral an hrialnak hmun ah nunnak liammi 130 an si tiah an langhter.
Ralhrialnak hmun in nunnak liammi hna chung ah hin cheukhat cu an umnak camp ah sii-ai le eiding har ruang ah nunnak liammi an si, cun a tam deuh cu SAC ralkap hriamngan hliamhnak ruang ah nunnak liammi an si tiah an langhter chih.
Uknak laak hnu thla 25 chung ah SAC ralkap le Karenni ralkap phufonh kar kahdohnak voi 586 tiang a chuak, cu kahdohnak chung ah cun Karenni ralkap phufonh in ralkap 224 an nunnak a liam i SAC ralkap lei in minung 1635 an thi tiah PKPF nih a thanhmi ah a langhter.
Uknak laak thla 25 chung ah cun Karen ramkulh ah SAC ralkap nih van lei kahdohnak voi 197 an tuah pin ah biaknak lei inn 30 le tualchung mi hna umnak inn 1352 an hrawhpiak hna.
Tlaihkhih a tongmi hi 279 an si i thih hlan lo thongthlak ding in biakhiahnak tuahpiakmi hi 9 an si tiah PKPF nih a thanhmi ah a langhter.TCP