June 6, 2023: Rev. Franklin Graham chuan kar hmasa Inrinni khan Seoul World Cup Stadium-ah Pathian thu sawina hun a hmang a, chhimtu mipui sing 7 chuang an awm. Kum 50 kalta khan helai hmunah vek hian Billy Graham chuan rawngbawlna hlawhtling tak a lo nei tawh nghe nghe.
Franklin Graham, president and CEO, Billy Graham Evangelistic Association chuan heti hian a sawi, “Kum 50 chhungin South Korea hi a va danglam nasa em! Khawvel pawh a danglam, mahse Pathianin a hmangaihna che u erawh a la danglam ve lo.
Pathianin a siam che a, a din cheu a, a hmangaih che a ni. A fapa Isua Krista chu nangmahni tlan tur cheuin a lo tir a, sual ata chhandam in nih thei nan. Chu thu chu in rin a, in pawm a, in sualte in sim chuan in Thlarau chhandamin a awm ang a, chatuanin a kutah in awm dawn a ni,” tiin a sawi.
Graham hian thu a sawi zawh hian Isua hnena an nun hlan thar duhte tan sawmna a siam a, mi sang tam takin an sualte sim tura intiamin an nun an hlan thar a ni. Franklin Graham chuan a pain kum 50 kaltaa rawng a lo bawl tawhna hmunah chuan thangtharte hnenah Lal Isua chanchin puan thar leh a duh avanga Pathian thu puang tura kal a nih thu a sawi.
CBN news in a tarlan danin Billy Graham khan khawmualpui 6-a ram 85-ah rawngbawlna (crusade outreach) a nei a. June 3, 1973-a Seoul hmuna a thusawi kha chhimtu tam ber niin Maktaduai 1.1 zet an ni. Hemi tum hian ni 5 chhung hun hmangin Korean Maktaduai 3 (nuai 30) zetin a thusawi an ngaithla a, South Korea ram nghawr nghing khawpin he crusade hi a hlawhtling a, mi tam tak Kristianah an inpe zui a ni.
Franklin Graham-a fapa, Will Graham-a (executive vice president of the Billy Graham Evangelistic Association) pawh hi thuhriltu ropui tak a ni a. Zirtawpni khan thalai 6,500 zingah thu a sawi. He Kohhran hi 60,000-member awmna, Presbyterian church, Seoul-a awm a ni a. Seoul World Cup Stadium-a Crusade hlawhtlin theih nan an tawngtai rual bawk a ni.