Voi dang kel bang zingkhuan in innka hram tiang a nu nih sianginn kai lio a fapa a hei thlah. A zanlei cu a rak i lawipi bal lo mi catlap raangte he a rak lawi. Siangcachimpa nih zei bantuk catial a putter hngal lo khin, “Ka nu hihi na va pek te lai tiah an ka ti,” tiah a nu cu a hei pek. Zei ko si hnga tiah lau nawn khin catlap raang cu a hun samh i a rel.
Mi fanau nu a mitthli fim tete a biangno cung ah an hung luang. Zei hngal lo a fapa mithmai aa thleng. Ka nu zeitin dah an ti, tiah a hun hal. Ka fa biapi hlapa um lo, na fapa fimnak le thiamnak zohchih cun kannih sianginn cu a phu lo, na fapa cawnpiaktu ding siangcachim kan ngei hna lo.
Cucaah kan sianginn ah rak kaiter ti hlah law nangmah pumpak in rak chimh cawnpiak ah a tha lai, an ti ko hih, tiah panh tein a hun leh. Sianginn in dumdawi mi a fapa cu hringtu a nu nih a si khawh tawkte in a cawnpiak.
Khuacaan sin ah a liam mi kum caan sin ah a dawt tuk mi a nu zamual a liam ve. Lungsiaherh in a liamtak mi a fapa tu cu minthang le milian ah a hung i chuah. A nu thih hnu ah siangcachimpa nih a rak pek mi catlap raang bilte a hmuh. A hun rel cu, “Na fapa hi thluak tlamtling lo a si caah amah bantuk ca ah kan sianginn cu a si kho lo.
Cucaah rak kaiter ti hlah, nangmahte tu in rak chim cawnpiak ko,” ti a si a hngalh. Aa thawh i, “Mimawlmok tiah rak ti mi pa cu miralṯha a nu thawngin miroling le mifim thil ti kho ah aa chuah,” tiah a ṯial ti si.
Thinlunglei tlamtlinglo ah an rak chiah mi pa cu nihin i kan i lawmhpi mi mei-ceu sertu Thomas Edison ah aa chuah ko. Tuanbia nih mi dang tahfung kan hman mi kong a kan cawnpiak. Minung hi kan hmailei kong ai hmu cia kan si lo.
Kan hawinu kan hawipa zuding sa-ei a si ruangah na tahnak fung a tawi tuk awk a si hlei lo. A sifah ruang zong ah zohniam tuk ding an si hlei fawn lo. Kan minung man hi aa tluk ceote an si. Kan sinak le dirhmun i khah lo ruangah kan khuasak aa lo lai lo, nain nun man ngei veve kan si dih hna.
Voi khat cu nupi halnak ah tarpa he kan i tong. Nulei biachimtu pa nih hitinhin a kan thawh, “Kan fanu hi minung ah nan kan zohpiak bantukin nan fapa zong minung zoh in kan zoh ve; cucaah khenkhamnak chimrel awk um lo,” tiah a ti. Kai lunghmui bak. Mi tahnak ah a hman mi fung kha rumnak ah a si lo, thiamnak ah a si lo, sithatnak zong ah a si lo, nun man upatnak ah hram a thlak.
Hi tarpa lungput hi kan miphun dihlak lungput si kho sehlaw kan zatlang nun a dam ngai hnga. Cheukhat cu hlan pipu chan kalphung phun sang le michia ruahnak a thlau kho lo kan tam tuk. Nihin vawleipi nih a tuar bik mi zawtnak hi cancer le COVID a si lem lo, “thleidannak” a si. Mi pakhat a nun man upatpiak lem lo in a titvun muici in siseh, a miphun in siseh, a theihhngalhnak le a khuasak tintuknak zoh in kan tah hna caah si.
Thomas Edison zong kha a theihhngalhnak zohchih in a cawnpiaktu hna tahfung a tlinh lo tiah biakhiahnak an tuahpiak, nain vawlei tuanbia ah philh awk tha lo miroling pakhat ah aa chuah ko. Cucaah na pawngkam minung tahfung na hman mi ruangah mi zuamhtaihnak ah va hmang hlah, hmailei na nun khuallam ah zei bantuk an si te lai na hngal lo. Carson Twintwin