Mah miphun hawi a simi rori cung i mah tluk an sual khawh hi khuaruahhar cu a si ve ko. State pakhat ah kum tamtuk khua a sa timi Chin miphun hawi cung i an lungput hi forhfialtu an nei ko lai. Chin ralzam pawl a dawi dihtu le a rem lo tu zong anmah an si ti si.
Hindu biaknak an biak ruangah si pah lai. Hindu biaknak kha a ttha lo ka tinak si loin India ram ah a tambik Hindu an si tik ah an i hmaihngal pi ti khawh si. Motor, motorcylce, inn le lo tampi a rawk pin ah minung 200 leng an thi cang ti si, mizo pa chim dan ah. Milu an i thlau tuk fawn tik ah Kuki, Hmar le Paite le Naga le Mizo pawl caah a fawi lo.
Thawngpang dang relchap- Kaphnih Kahdohnak Um Lo In SAC Ralkap Nih Minkin Peng Ah Bomb An Thlak Caah Ngakchia Telh In Mi 6 Nunnak Liam
Sagaing ramṭhen, Minkin peng Pihkaya (ပိက္ခရား) khua cu SAC ralkap nih kaphnih kar kahdohnak um lo in vanlawng in bomb thlaknak a tuah caah tualchung mi an nunnak a liam tiah theih a si.
May 4, chunhnu suimilam 1:00 hrawng ah vanlawng 1 nih ngiatthlainak a tuah i a dang vanlawng pakhat nih bomb a thlak, cu hnu minutes tlampal a rau ah a dang vanlawng pakhat nih kahdohnak a tuah tiah theih a si.
Sianginn le phungki sianginn pawnghrawng cu vanlawng in voi thum tiang kahdohnak an tuah, voi khatnak ral tuknak vanlawng nih bomb a thlak ah khuami hna cu an zaam manh caah nunnak liam mi zong an tamtuk lo nak asi. SAC ralkap nih jet fighter hmang in bomb a thlak ruang ah nunnak liam mi hna chung in ngakchia le tar zong an i tel” tiah Minkin battalion 5 in ralkap Ai Oo nih a chim.
Nunnak liam mi hna chung ah kum 12 tang ngakchia zong an i tel i, an min le an sining dikthlir cu taan takmi an chungkhar himnak caah langhter a ngah rih lo tiah a chim. SAC ralkap nih van lei kahdohnak a tuah ruang ah suaknak ngei lo tualchung mi 3 cu hmakhat te ah an nunnak a liam i, adang 3 cu hliamhma fak an tuar hnu ah an nunnak a liam.
Cu pin ah hliamhma fak a tuar mi 15 an um i an nun humhimnak caah thinphang an si ko tiah theih a si. Tutan ah SAC ralkap nih van lei kahdohnak a tuahnak hmun hi Pihkaya khua a si i, cu ka khua in meters 100 aa hlatnak ah pyusawhti tampi an umnak Ma Oo khua a um.
Ma Oo khua cu tualchung hriamtlai phu nih atu le atu kahdohnak an tuah lengmang hna caah, cu ka khua he aa naihnak khua hna cu SAC ralkap nih atu bantuk in van lei kahdohnak an tuah hi a si kho tiah ralkap Ai Oo nih cun a chimTCP