SAC ralkap nih a luancia March le April thla 2 ah Chinram chung ah kahdohnak zeihmanh um loin khuapi pakhat le khuate 3 ah vanlawng in bomb a thlak caah sualnak ngei lo tualchungmi 23 an nunnak a liam.
March 30, ah Thantlang peng Khuafo khua ah SAC ralkap nih vanlawng in bomb a thlak caah kum tling lo ngakchia 2 telh in khuami 9 nunnak liam in 11 nih hliam an tuar.
April 10, ah Falam peng Webulah khua ah vanlawng in bomb a thlak ṭhan i pastor pa le siangcachim nu pakhat telh in khuami 9 nunnak a liam i 4 nih hliam an tuar.
April 16, zanlei sang ah Mindat peng Panpa khua ah vanlawng hmang in bomb a thlak ṭhan caah kum tling lo ngakchia telh in khuami 3 an nunnak a liam i 9 nih hliam an tuar.
April 22, zong ah Thantlang peng Tlanglo khua ah vanlawng in bomb a thlak ṭhan caah fimcawnnak zung rianṭuan i CDM a tuahmi nu pakhat le pa pakhat an nunnak a liam i 9 nih hliam an tuar.
Kaphnih kar i kahdohnak zeihmanh um loin SAC ralkap nih hin timh ciammam tein Khuafo, Webulah, Panpa le Tlanglo khua hna ah hin vanlawng hmang in bomb a thlak.
SAC ralkap Vanlawng bomb thlaknak in nunnak liammi 23 lak ah kum tling lo ngakchia 3 an i tel i hliamhma tuarmi 35 lak zong ah kum tling lo ngakchia 4 an i tel. SAC ralkap vanlawng in bomb thlaknak ruang ah biakinn 4 telh in inn 50 leng a rawk. Crd. to The Chin Journal