Manipur tualchhung buaina a chhuah hlim khan Meitei lam khan tlangmi christian biak in an bitum nghal a, biak in tam tak halin, mimal chenna in thlengin an hal ta a. Tlang mite thinrim chuan Churachanpur-a Meitei awmna venga in ding zawng zawng an hal chhiat sak ve ta a, a mihringte erawh thi an awm lo. Meitei te hi Churachanpur khawpui chhunga 36 Assam Rifles Camp, BSF camp leh DC office complex-ah te an tlan khawm a ni.
Imphal lamah Churachanpur mi Zo hnahthlak (tribal) hnathawka awm tangkhang te chu Assam Riles camp leh CRPF camp-ah te, Airport campound chhungah te an inkulh bawk a. Churachanpur lama Zofa tangkhangte hi an tam tham hle mai a, buhfai an tlachham a, tui in tur takngial pawh an tlachham tawh a ni. Anmahni vengtute zingah hian Meitei hel ho an inzepru nia hriain an ring zo tawh lova, thlabar takin an awm a mek. Hetiang dinhmun khirhkhan taka an awm mek lai hian, Manipur sorkarah venhimna hnuaiah tlangmi tangkhangte hi Churachanpur lama phur thleng turin an ngen a, vawiin thlengin hruaichhuah an la ni lo.
Hetih mek lai hian, venhimna hnuaiah Meitei nunau te erawh hmun him lamah hruai chhuah reng an niin thu dawn a ni. Heti ang hi thil awmdan a nih avangin, kan unau Imphal lama tangte hruaichhuak tura sorkar kar nan tiin, Churachanpur khawpui chhung; 36 Assam Rifles Camp, BSF camp leh DC office complex-a Meitei nunau tangkhang mekte chu lak chhuah an remti ta bik lova, hmeichhe hoin an veng ve thin a ni.
Nizan lamah khan thu thang a awm ta a, Churachanpur khaw chhunga Meitei tang mekte chu sipai venhimna hnuaiah hruaichhuah tumna a awm a, chumi veng tur chuan hmeichhia zawng zawng chhuah khawm tur tiin an au a. Meitei ho an lakchhuah vek chuan Imphal lama tangkhang Zofate an thah chimih duh mai ringte pawh an awm hial a ni. Boruak a tang hle mai. Meitei tangkhang lak chhuah tum dang turin an chhuak khawm ta a. Hmeichhia zawng zawng chhuah tur an tih mek laiin, mipa an rawn chhuak tel ta teuh mai a.
Mipa an lan chuan silai a puak ngei ngei thin si a. Boruak a muanawm lo ta hle mai. Meitei inkulhna hmun hrang hrangah an chhuak tur dan tumin hmeichhiain hma an hruai ta a. Sipai (Central force) ho an lo khauh hle. “Minute 5 hun kan pe a ang che u, kir leh rawh u” an lo ti a. Tuma’n kir zai an rel lo. Minute 5 a liam a, silai a puak ta a. Kan unaute lamin sairawkherh an hmang thung a. Mi 40 in hliam an tuar a, mi 3; hmeichhia 2 leh mipa pakhat ten nunna an chan leh ta a ni.
MIMAL LIRTHEI HMANGA RAWN RALTLAN DUH TEN PETROL LEH DIESEL AN NEI LO. Churachanpur atanga Mizoram lam panna kawng lamah hian Mizo deuh vek an awm avangin a ralmuang a, sahimna zawnga rawn raltlan turin motor number leh a neitute an han inziak khawm a, petrol leh diesel nei aram an lo awm lo niin thu kan dawng. Petrol leh diesel Mizoram lam atanga pek theih thuai dan kawng dap sak a tul ta niin a lang.
IMPHAL LAM VE THUNG – Imphal lam pawh a ralmuang lo hle a, hlauhawm karah ramhnuai leh mi nul huan kaltlanga Airport vak thleng thei hram, thlawhtheihna hmanga Mizoram lam rawn pan tum mekte pawh an awm. Imphal khawpuia nunau tangkhangte awmna sipai camp chu nizan khan ‘Meitei hel hovin an kap dawn’ tih sawi thawm a awm a, mipui an thlabar hle a. Sipai ho chuan mipui mangang thlamuanin, “an rawn kap a nih chuan kan kap let ve dawn alawm” tiin an tawng thlamuan a, mahse, sipai ho pawh an ring zo tawh lo niin thu dawnna chuan a sawi. Thudawnna chuan, “Hetiang dinhmun hlauhawm leh khirhkhan karah chuan inrin zawh loh mai hi thil awl tak a ni a, thenawm takngial pawh kan inring zo tawh lo a ni a, hei hi chu buaiin a hrin a ni ve hrim hrim bawk a” a ti.
Imphal lam atanga thu dawnna pakhat chuan, “Mizo thalai, Regional Institute of Medical Sciences (RIMS) zirlai te, Central Agriculture University te, leh Nursing College zirlaite an mangang em em tawh a, North East state dang ten an zirlai tangkhangte an thiarchhuak nasa tawh si a, Mizoram sorkar a che muang lutuk hi kan mangang lutuk tawh a ni” a ti.
“Tukinah ngei pawh a trip hnihna tur nursing college zirlai pawh an rawn hruai leh tawh a. Keini hi tuman min la rawn hruai ve lo. Zirlai ten duty form hain duty anga inlantirin hmun hrang hrangah an insemdarh ringawt mai a, kan dinhmun hi a hlauhawm a, kan sorkar hi rawn che thuai se kan duh takmeuh a ni” a ti.