4th May, 2023 (MSR) Manipur buaina hi a inthamna a rei tawh hle. Kum 2008 August thla khan, khatih laia Manipur state sorkar chuan, Suspension Of Operation (SOO) hming phuahin Manipur state chhunga hel pawl hrang hrangte a ko khawm a. Manipur state chhungah hian hel pawl an tam hle a, tribal hel pawl hi hlawm hnihah an intel khawm a, unit 25 zet an awm.
Meitei hnam zingah pawh hel pawl 4 an awm a, hel pawl 4-ah hian unit 10 vel lai an awm ve bawk. SOO-ah hian tribal hel pawl lam an kal tha hle a, Kuki hnam lian thenkhat erawh an kal lo hlawm. Meitei hel an kal tam lo hle bawk a.
Chung hel pawl an koh khawmte nen chuan, sorkarin inremna an ziahpui ta a. An area theuhah buaina siam tawh lo turin inremna an siampui a, mi pakhat zelah an rank a zirin thlatin cheng 4000 atanga singkhat pe turin inremna an siampui a. An tiam ang hian sum pawh an pe chho ta zel a ni.
Sum hmanga an tih lungawi takah chuan, hel ho hian silai leh ralthuam lam an ngaihthah ta hle a. Zalen taka awmin sorkar atangin thlatin sum an dawng a, nuamsa taka an awm takah chuan, ruih theih thila tal buai ta mai mai tawk pawh an tam ta hle niin an sawi bawk.
Heti anga lungmuang leh inthlah zalen taka kum tam an awm chhoh mek laiin, tunah buaina a rawn chhuak ta thut mai a. Meitei Hindu firfiak ho erawh chuan ralthuam an lo nei tha hle mai si a. Tun thil thleng hi, kum tam tak atanga ruahmana awm tawh, a taka tih puitlin tumna nia an rin thu Zofa kan unaute chuan an sawi.
Manipur tlangmite nawr chhuah tumna hi a intanna a rei tawh hle a, thangkhat lian dawn thaw atanga an ruahmanna kha tunah hian tih puitlin an tum ta niin mi thenkhat chuan an ngai a ni.
Meitei firfiakte hian tribal-te hi an awmna chhuahsan turin zanin (4.5.2023) hun an pe a, nunau leh mipui thlabarin an awm mek a. Imphal area chhunga tribal ho inthiarchhuah tumte chuan Assam Rifles belin AR hmunah an awm mek a. Chung inthiarchhuah tumte chu Meitei hoin an kal phal lovin an dang bet tlat a.
Chumi thawm an hriat avangin Churachanpur atanga Meitei ho inthiar chhuak turte pawh Tribal hoin an dang bet ve thung bawk. Hmun hrang hrangah in kang leh buaina thleng thawm a awm reng a. Silai puak thawm a awm reng bawk niin thudawnna chuan a sawi.