(35th Chin Revolution Day 20 March 2023 Caah Capar) Kawlram pumpi in Kawlte Ralhrang Rallokap hi Pauchuak Dohthlennak ah kan doh hna rua tiah kan ruah nain a tak ah a rak si lo. NUG nih Kawlram pumpi in an doh lo bantukin MAH zong nih Kawlram pumpi doh a herh ah a ruah lo i MAH Strategic Planning ah aa tel fawn lo.
NUG Federal Ralkap Humhual ram asi mi Kawlte ram cu NUG nih raldohnak biatak tein an tuah ballo caah Raldohnak aum lo hi asi. MAH nih a uk khawh ve cang hna I Raldoh awkah MAH te nih an ruah ti hna lo. EAOs tei lawng ah NUG an tla lai, EAOs an um lo ahcun NUG a dih tiah MAH Tuak dan cu asi.
NUG le Mipi tei awkah Martial Law thanhnak Pengkulh 47 tei ahcun Pauchuak Dohthlennak hi a dih cang tiah MAH te nih an tuak. Martial Law in uknak Pengkulh 47 chungah an thimh hlei mi hna cu: Chin, Karenni, Karen (KTLA hmun ram Pengkulh 2 asimi Kawkarei le Ciainn Seici), Sagaing le Magway Hmun 5 hi ansi. Hi hmun 5 chungah CHINRAM Pengkulh 8 aa tel.
7 EAOs asimi, Cantling Ralkap 110000 le Reserved 35000 a ngei mi Northern Alliance phu (KIA, UWSA, SSPP, AA, TNLA, MNDAA, NDAA – Mailaa) cu Gen. Yapyit Hruaimi FPNCC le Tuluk Palai pa hmang in PEACE tuah awkah MAH nih aa zuam cuahmah lio asi. 2022 December, 2023 January, 2023 March 15-16, 2023 March 17 tbkin Voi 4 tawnnak an ngei cang. Japan PEACE Puaisa pa Sa Sa Kawa zong aa tel ve.
Pauchuak Dohthlennak ah KIA aa tello ahcun TEI a fawi lai tiah MAH nih a tuak caah FPNCC ah PEACE tuah dingin KIA cu an sawm ve hna. KIA nih NUG le Mipi kaltak in PEACE a tuah lai cu ka zumh lo. Panglong le Federal kongah NUG NUCC CRPH kha pressure pek an duh caah asi ko lai.
Pauchuak Dohthlennak TEI awkah MAH Strategic Planning kan zoh tikah CHINLAND tei ahcun adih cang tiah a ti mi hi Tehte (Hngalh pinak) tampi hmuh khawh asi. Tutan CHINLAND ah Thazang tampi he hmun thum in an kan kai hnawh mi nih CHINLAND tei lawngah Pauchuak Dohthlennak ka tei lai I NUG an sung lai tiah MAH nih a ruah kha 100% hngalh khawh asi.
Chinram ah CNA le an nau le hriamtlai hna nih Ral kan tei lo ahcun MAH nih Kawlram a uk khawh cang lai. NUG NUCC CRPH ICNCC zong pakpalawng an si cang lai. Tutan ah MAH nih CHINRAM an kan tei ahcun Kawlram vialte le Tlangcungmi vialte Kawl Saal zungzal kan si cang lai. Kan chan chung ah Federal um ti lai lo.
Tutan CHINLAND ah Ralhrang MAH te nih an kan tei lo nak hnga rian ngeih tu cu CNA le CDF ansi lo. Ramchung Ram leng um CHINMI vialte nih Pakhat hmanh bau lo tein le I zukphiar lo tein, kan ngeihchiah chawva in, Ralhrang kan doh ve a herh. Cuticun ral kan doh lo ahcun Ral tei khawh asi lai lo. Pathian le CNA thawng in Ral cu kan sung lailo nain Ralhrang kan tei ve lai lo.
USA ah aum mi CHINMI hi 80000 leng kan si, Australia ah aum mi CHINMI hi 20000 leng kan si lai. Europe le a dang ah aum mi rel rih loin Nuai 1 (100000) kan si. USA le USA um Phuntungtu le Ramdawtu CHINMI mi hnarcheu I Cheu chin nih USD 1000 cio kan thawh ahcun USD 25 million bak asi colh ko.
Hnarcheu nih USD 1000 cio in asi ahcun USD 50 million asi. Chinmi vialte nih Miphun ah lungfak taktak nak he kan thawh cio I Chin Miphun le Chinram caah kan ṭuan cio ahcun USD 100 million hi a har lo I Ralhrang kan thluk fawn lai. AA le a dang chinmi kan ral 7 zong nih an kan tei khawh lai lo. Zei bantuk ral hmanh nih tei khawh lo ding mi CHINMI kan si cang ve lai.
Cakei le Pawpi nih an ṭhawnnak hngalh loin hlen nak hna kha an I zumh I, Ceihngia le Naatum an tih bang CHINMI nih kan thawn nak hngalh loin MAH te Kawl Ralhrang nih kan tih lo hna nak hnga, I hrim ṭhan usih tiah thawng thanh buin kan nawl ko hna. Tutan Ral kan tei I Ralhrang kan thluk khawh nak hnga NUG a biapi lo.
Ramdang um CHINMI kan biapi bik. Abikin Ramdang um CHIN Millionaires hna nih Ngeihchiah chawva cu Miphun le ram luatnak le Zungzal zalennak caah Kan bungh hnawh can hna a biapi. Raltei awkah NUG nakin CHINMI kan biapi deuh saumau. Pathian nih an kan thlawchuah mi Kan Chawva in MAH te Ralhrang TEINAK lei ah panh cang usih. Saya H. Rung Kaw