SAC Ralkap Sakhan Laak Kahdohnak Ah KA Le KNDF Chungtel 10 Nunnak Liam. Karenni ramkulh Myanmar-Thailand ramri BP-12 pawng ummi SAC ralkap hriamngan chiahnak sakhan cu KA le KNDF nih luhhnawh in an va kahdoh hna.
![May be an image of 13 people, people standing and outdoors](https://scontent.fdel7-1.fna.fbcdn.net/v/t39.30808-6/335140012_209426438331798_5132870397811613081_n.jpg?_nc_cat=107&ccb=1-7&_nc_sid=8bfeb9&_nc_ohc=xuu5L1R7v-YAX8vjDzk&_nc_ht=scontent.fdel7-1.fna&oh=00_AfCseGiCxiYxe22TUsY89mTj9sUidwmIFpuaYAvPUdFmVA&oe=640E0338)
Cu kahdohnak ah cun SAC ralkap 10 an thi i KA le KNDF chungtel 10 an nunnak a liam ve, hliamhma tuarmi zong an um tiah karenni lei in chimphuannak nawl ngeitu Kho Ngeral nih a chim.
A luancia February ni 27, zinglei ah SAC ralkap sakhan cu kahdoh in an sakhan laak a si lio h SAC ralkap lei a thimi ruak 10 kan hmuh, 120mm hriamngan telh in hriamngan hriamhme phuntling 10 kan laak khawh tiah cathanh an rak chuah.
Kaphnih kar i kahdohnak ah KA chungtel 8 le KNDF in ralkap 2 tiin minung 10 an nunnak a liam tiah Kho Ngeral nih nihin March ni 8 ah fehternak he a chim. Karenni ralkap phufonh lei in minung 15 hrawng nih hliamhma an tuar tiah a chim chap.
“Kaphnih kar i kahdohnak chung ah tutan hi kanmah lei nunnak liammi an tam bik tan a si, hliamhma tuar zong an tam. Vanlei in vanlawng 5 nih an kan kahdoh caah nai tan kahdohnak hi a fak taktak” tiah Kho Ngeral nih cun a chim.
Kahdohnak chung ah nunnak liammi ralkap hna ruakvuinak program cu March ni 6 ah tlamtling tein kan tuah khawh tiah Karenni ralkap chungtel pakhat nih a chim.TCP