Tlangcung aiawh hriamtlai vialte nih Federal Union ram thar dirhnak caah a hrampi a si mi ramkhelnak he pehtlaiin tlukruannak (political equality) hi lohthei lo kan ngah a herh timi 100% an i fiang. FPNCC hriamtlai buu hi a fiang khun mi an lo. A fawinak cun “Bama State” hi an ser hrimhrim a herh.
Kawl politician tampi nih “Bama State” ser ahcun a hal chap ding an tam i Union in chuahnak lam zong a fawi tiah an ziaza thing an chuah than hoi cang.CRPH zong nih “Bama State” dirh ding cu an hmur an i cip. Tulio dothlennak i MAH le rual teinak ding caah mah hi dawntu bik a si tiah ka ruah.
Tlangcung hriamtlai hna sinah Union thar sernak kongah hnatlak pi (Political agreement) min thutnak zeihmanh tuah pi loin an hmurka lawngin Federal Democracy ram thar kan ser lai ti cu MAH kan tei hnu ah zei bantuk political system in dah kan kal lai timi a muisam a fiang lo.
A voi (2) nak ral dohnak zong a chuak kho. Kan Inn pa China le India, ASEAN le US le Western Countries sin i kanmah lei tang hna seh tiah Lobby an tuah tikah MAH hi an tei taktak lai maw? Biak tak tein tanpi an phu maw? timi hi an zoh mi ah ai tel ve ve hrimhrim lai. Cuti an zoh tikah an tahfung hi zeidah a si kun hnga?
China le India hi an bia pi tuk. An nih hi zawngzer a ngeimi, a thawnglei kap poah i mer i a dermi leikap hlen deh i anmah miaknak hmuh a duhmi lawng an si. Kan inn pa si hlah uh ti zong a ngah fawn lo. China nih kawlram mipi duhnak hi a biapi ah a ruah ti a langhnak cu June 2015 ah anmah sawmnak in ASSK nih a va tlawng hna.
Hi lio ah thimnak zong an tuah rih lo nain a tei lai tiah an ruahcia caah an sawm mi si dawh a si. Phun dangin chim ahcun Kawl mipi nih an tei lai i mipi duhnak hi China nih tuak chih lo (Ignore) a ngah lo an ti caah an sawm mi a si ko. India cu China a cawlcangh mi tiluan zoh in a cawl ve mi a si.
CRPH nih “Bama State” kan dirh ve lai. Federal Union Thar dirhnak caah Tlangcung Hriamtlai he a fekmi hnatlaknak (Political Agreement) min kan thut lai i MAH le rual hi kan doh ti dih hna lai ti kho hna seh law. MAH le rual kan tei lo nak ding a ruang khi a pelte hmanh a um lo.
Cutikah China zong nih Kawlram mipi an lung ai rual cang caah teinak cu an kut cungah a um cang i anmah lei ka dir ahhin ka miak deuh lai tiah a lungtlennak lam cu ai awng ve ko lai.US le Western Ram hna le ASEAN zong nih hmual ngei deuh in a kan bawmh khawhnak lam a si ve. Cucaah hi ral kan teinak caah tawh a tlaitu cu CRPH hi an si.
Born Again an si lo i hi hnu kum 3-4 chung kanmah zong nih tei lo, Ralhrang zong nih tei lo dirhmun kan si ahcun Kawlram hi ai then thek kho mi a si. Kan innpa ram hna le a dangdang ram le buu zong lobby tuah cu a herh hrim ve.Cu nakin a biapi deuh mi cu kanmah tlangcung mi le CRPH karlak lobby tuah hi a si.Ka lung um bia ka tial sawh mi a si. Salai Tin Maung Win