Kaleb le Joshua: Ram buainak kum 2 a tling cang. Thlennak muithlam a leng kho bal rihlo. Thah le nawn, hrawh le hral, khangh le uh, thio le dawi a zual chin lengmang. Dothlen rian lung a dongmi le dohmi hna lei mer a duhmi aw-an a leng. Judahmi Kanaan ram an panh lio ah hibantuk hi an rak tong.
Izip ram in Kadesh-barnea an phanh hi kumhnih dongh, akum 3nak ah a si. Kanaan ram a tawlei ramri naih an phan (Lairam in chim ahcun Paletwa thlang Rakhine ramri tluk khi a si hnga). Hika hmun hin Kanaan ram chung luh Pathian nih a fial hna. Sihmanhsehlaw an duhlo, an al.
Ram ngiatu thlah hmasa usih tiah an ti (Deut.1:19-25). Hihi fim khuakhan a lo nain Judahmi caah Pathian kamhmi ram luhnak ding khuacan a sau tertu le mi tampi cawhnuk le khuaitizu in a khatmi ram phan kholo I an thihnak lehlam a si.
Ram va ngiat ding ah an phun cio chung in hruaitu 12 an thim hna I kamhmi ram cu an va zoh, an va tol. Ni 40 an rau. An va hmuhmi aa khat. Mitsur borkhat, mi pahnih lang zonh hau, le theidang an phurh. Ramtha tuk a si, an khua hna cu an ngan I fektuk in kulhmi an si, an minung zong mingan pipi an si an ti.
An cuanh ning (comment) bel aa dang. Mi 10 hna nih cun kan tei kho hna lailo, annih sin ahcun kannih cu khuabok bantuk ceu kan si an ti. An phun cio hruaitu hna nih cuti an chim tik ah mi vialte an ngaih a chia I an tap. Moses le Aaron cung ah an thin a hung. Izip ram ahkhan rak um ko usih law a tha deuh an ti.
An rak celhlo mi sal sinak tu kha an ngai than. Ziah ramcar chung tal ahkhan kan rak thihlo an ti. Kaleb le Joshua tu nih cun, a silo, va nam in va luh hnawh ko hna usih, Bawipa nih a kan pekmi a si, kan tei hrimhrim ko hna lai an ti. Mi 10 hna nih an ral thawnnak an zoh I an chim.
Kaleb le Joshua nihcun Pathian bochan in bia an chim. Mizapi an lung a dong. Hruaitu I thim usihlaw Izip ah kir ko usih an ti. Bawipa a thin a hung. Rai a tlun ter I mi tampi an thi, mingiatu 10 zong kha an thi.
Hihin Pathian nih an lam a thlen piak hna. A kamhmi hna ram phakpi cu a timh ko hna nain an lam a thlen. Chuk ah saupi a zuan ter hna, cho ah an kai than i lam hla deuh pi in an hel than (Deut. 2:1). (Paletwa in lut colhlo in, Rakhine ram in Yangion- Mandalay-Kalay in Lairam luh bantuk a si). Harnak dang tampi an tong. Kum 38 an rau. Kum 20 cungmi vialte an thi. Aaron le Moses lila zong an thi.
Izip in aa thawhmi ah Kaleb le Joshua lawng nih Kamhmi ram an hmuh. Naite an um lio ah Bawipa bia an ngailo, report thalo an I zumh, Izip sal tannak an ngai than, Moses an doh. Anmah le anmah hmetuk ah an I ruat. Kan ral cu an an thawngtuk, an ngan tuk, an hriam a tha tuk, kan tei hna lailo an ti. Cucu an rawhnak ah a cang.
Hihi kan tuanbia a si lio ve. Atu hi Kadesh-barnia kan um lio bantuk a si. Kan tei tung lailo, hriam hmanh kan nei thitha lo, cozahpi tei cu a har tuk … MAH he bia ruah a tha deuh … a timi an puang pah cang hih.
Dawh ngai in an chim. Izip sal tan, Sal sabel hram thut an ngai than. Chuah than khawh tilo dingmi sal khur thuk chung luh than ceu a si lai. Zeitik ahkhan hme kan rak him bal? Zeihme an sin in kan hmuh bal?
Serhsatnak, thlanglamh le zomhtaihnak kan ing thluangthluan. Cucu maw kan kir hnawh than ko hnga? Maw Kaleb le Joshua thangpi in au ko sawh u. Nan lung thul hlah u. Kanaan ram pei a nai tuk cang hi! Bawipa hruainak nehnang lengluang hi philh sual hlah usih. Credit- M. THAWNG KAM.