A luancia April 19 lioah Mizoram ramkulh, Lunglei thonginn bauh in a rak zaammi 5 lak ah aa tel vemi pakhat Lalchawimawia (kum 24) cu nihin April 25, zing suimilam 12:30 hrawng ah an tlaih khawh ṭhan tiah theih a si.
“Lunglei thonginn bauh in a zaammi Lalchawimawia (kum 24) cu Hnahthial palik le Khawhri khua YMA i bawm in kan kawl i nihin April 25, zing suimilam 12:30 hrawng ah ramlak thlam pakhat ah kan tlaih khawh ṭhan i, Hnahthial palik nih an kalpi” tiah Khawhri khuami pakhat nih The Chin Post ah a chim.
“Atu kan tlaihmi Lalchawimawia hi zeidang case ruang ah si loin mithah lainawnnak ruang ah rak tlaih i thlongtlakmi a si” tiah a chim chap. April 19, lioah thongtla zaami hi an zate ah 5 an si i 2 cu April 20, zan suimilam 8:00 hrawng ah Lunglei le Haulawng kar Mausen khua ah an rak tlaih khawh ve cang hna.
Lalchawimawia (kum 24) telh in thongtla zaam 5 lak ah 3 cu tlaih an si cang nain Hau Deih Cin (kum 25) le Van Nei Thang (kum 38) cu khoika an um le an kal theih khawh a si rih lo caah Mizoram palik nih mipi sin ah ralrinpeknak le bawmhhalnak zong a tuah tiah theih a si.TCP