Pakokko In SAC Ralkap Leilawng 80 Chinram Lei Ah An Kai. Magway ramṭhen, Pakokko 101 battalion in SAC ralkap leilawng 80 cu nihin March 10, zinglei ah Chinram lei hoih in an kai tiah theih a si.
A voi khatnak ah SAC ralkap leilawng run 15 an chuak i a voi hnihnak ah 10 an chuak ṭhan tiah theih a si.
A hnu bik thawngpang theih ning ah SAC ralkap leilawng hna cu nihin March ni 10, chun suimilam 12:00 hrawng ah Kanma khua an pal tiah theih a si.
Cu hnu ah SAC ralkap leilawng run 57 cu Kanma khua an pal hnu ah nitlaklei hoih in an chuak. Cu leilawng run chung ah cun SAC ralkap lawng si loin pyusawhti phu hna zong an i tel tiah theih a si.
SAC ralkap leilawng run hna hi Chin ramkulh lei an panh tiah theih a si. Cu leilawng ruun hna cu Pauk-Kyaukhtu- Mindat lampi in maw an kal lai Pauk-Kyaw-Gangaw lei hoih in dah an kal lai ti cu theih a si rih lo.
Sagaing Ramṭhen In Hakha Lei Panhmi SAC Ralkap Leilawng Run Kahdoh An Ton Caah 6 Hrawng An Thi.
Sagaing ramṭhen, Kalaymyo in Chin ramkulh Hakha ah riahcaw le hriamthil chanh aa thawhmi SAC ralkap leilawng run cu nihin March ni 10 ah kan kahdoh hna, a thimi le aa hliammi zong an um tiah CNA in chimphuannak nawlngeitu Salai Htet Ni nih a chim.
March ni 7 ah Sagaing ramṭhen Kalaymyo in SAC ralkap leilawng run 30 tluk cu Chin ramkulh lei panh in an rak i thawh tiah theih a si.
“Hakha SAC ralkap umnak hmun ah riahcaw phurh ding in aa thawhmi leilawng run hna he nihin March ni 10, Tedim hmunram chung ah kahdohnak a chuak. Mine kan tarhnak hmun chung ah SAC ralkap 6 an thi, minung 14 nih hliamhma an pu” tiah Salai Htet Ni nih a chim.
Hakha tiang riahcaw phanhpi aa timmi SAC ralkap leilawng run cu kahdohnak kan tuah rih lai caah kahdohnak a fak kho tiah a chim chap. The Chin Post