“Riahbuk” ka rak tlumh lio ah, “Lai-vok” le Lai-ar” kong ka rak thai. Vawlei cung voksa le arsa lakah a thaw bikmi ‘a rim a hmui bak in hmuimi’ ka rak ti.Ngasa lakah tah khuazei ram ngasa dah an thaw bik?
Rili he aa naihnak Korea le Japan tbk phun ah cun, tuna a min thang. Kuria nihcun chamchi (참치) tiah an kawh i a sa khi senvaar nawn in an um.
Tuna phun khi cu tin zongin a phunphun in an chuah. A hring in eimi deuh a si. Japan sushi tuahnak i an hmanmi ngasa sen-vaar khi si.
Kuria ah cun an ngasa an thaw lo taktak; an dihlak ngawt in thawtnam an ngei hna lo. Kawlram a lumnak ngasa hmanh an tluk hna lo.
Ngaleng phun bantuk nawn zong khi an um ve i a thaw tuk ding an lo nain, TT holh cun “a meih lo kho siing tak” khi si.
Ngarul khi “cang-aw” an ti i an uar lawng si lo, a man faak emem. Cu an ngarul zong cu Lai ngarul he lam cun, a ceih ceih ding khi um lo.
Ngasa a hring in chumh ding maw siloah kiau ding phunphai zongah maw ti cun, ramdang lei an nga pawl cu an ti lo ngai. Tuna lebang chumh le kiau rai lo nga phun an si; a hring ei ding phun deuh.
Ram tampi ka phanh lo tikah, ka teh bal lomi tampi um lai. A hring chumh ding le caar hnu i ei ding phun lam ah cun Lai ngaleng nak mak an um lo.
Lai ngaleng cu a hring in chumh ko ah lung a hmui; a haang khaa nawn khin um i a thawtnam khi ai phundang i a ti kho taktak. Lai ngaleng hmanh ah, Farrawn Lahva le Ṭio ngaleng sa an rim hmui in an tui kho bik, ti si.
Ṭio ngaleng caar ei balmi nih cun, Bungzung lei ngaleng caar khi cu adeu ah an ruah lai. Silole Tuluk siam maw si hnga an ti khawh men.
Mah tluk cun kan Lairam tiva ciocio hmanh ah a lum deuhnak le a kih deuhnak hmun, siloah pawngkam thingram kheu aa dannak hmun nga sa hna cu an thawtnam aa dang.
Ṭio ngavang cu a min thang ngai. Lailei upa deuh nih an uar. Ka uar ngai ve ko. A ii pah i a tit tam. Ngasa lakah a thaw bik ah a chiatu zong an um. Laica cawnnak tu ahkhan cun “Ngasa lakah ngacun sa thaw bik” tiah cawn a rak si.
Ngacun timi cu zei dik si, ka hngae ve lo i ka hmu bal fawn rua lo. Lai ngapum zong a thawmi cu an thaw lawlaw. A khaa nawnmi ko ko khi an mak. TT lahva nga cu an thaw tuk lo; a lum deuh caah si lai tiah an ti.
Nain, si lem lai lo. a pawngkam ti a puttertu thingkung le thinghram tehna nih a ngeih khawh men. Timit ngapum lam cu a mak bakmi si. Vawleicung hmun dang ah hmuh khawh lo phun si ve.
Lai lei cheukhat upa caah cun Kuria lei Tuna nga “tin” in an tuahmi khi a thaw bak an ti lai; ngavang sa lo an ti khawh men. Kei ka or bel cun, a ii pah i ka rem ziar lo.
Lunghmui tak i zeimaw caan a hring chumh von ei dingah cun, Timit ngapum le Ṭio ngaleng an thaw bik ko rua. Nang tah? Salai C Alexander