Pawkhlet cung khuaruah: Laimi hi kan ral kan tei ngaingai hnga maw heiti hrawng khi biatak tein kai ruat sek len ve tawn. Cu lawng hlah. Vancung khua hna khi Malaysia kan rak um lio i “kai ruah ningin a si loh“ timi bia bang, kan i ruah lo ning hna in a va si sual cio te hnga maw ti zong khi ka hei ruat chih viama hme teh aw. Zeicatiah, Kawl nih “saya mia zin tinbaw piat de“ an ti sikaw, Laimi hi saza cu kan tam bak ve fawn cu. Vawlei lei he vanlei he.
Hi tluk milurel a tlawmmi ah mah zahzah saza cu zaapi kan um ti lo ko cu mu. A um chun zaapi zong nih aho chimmi cu dah kan zumh lai timi hmanh kan i fiang huaha cio ti hna lo hi. A keimah chinchap i pawkhlet cung khuaruah chinchap cu Bawinu ral hmanh va pet kho lai hlah ka ti ko buin!
Laimi rengreng hi kan uar laklawh cangmi hna kha ek ngei lo ah chiah kan hmang tawn hna i, kan uar ti hna lo hnuah ei lo sa bantuk ah chiah ṭhan kan hmang fawn hna. A poi ngaingainak cu, kan uar hna lio i kan chimmi kan bia le kan hla lengluang kha kan uar ti hna lo hnuah laak ṭhan awk an ṭha ti lo i, hlonh awk zong an ṭha ti lomi hi a poi bakmi cu a si. Cu Laimi kan lungput cu Pu Henrry Van Ṭhio le Dr. Hmuh Thang ah kan lang bak.
A ngaingai tiah, Pu Henrry Van Ṭhio le Dr. Hmuh Thang khi anmah an sining tein an si peng ko cu. Kanmah tu nih ek ngei lo ah kan hei chiah chel hna, ei lo sa ah kan hei chiah chel hna i a si ko. Anmah tu cu ti cawh bak lo “Cianh Khaing Zi“(USDP)dekmak te an si ko. Anmah pahnih kong lawng hlah. Vanlei kong zong kan si ko.
Pu Henrry Van Ṭhio Vice President a rak si lio kha mi vialte nih “Pathian pekmi a si“rak ti lulh cio a si. Paran le siaki he hla tiang kan rak phuah len. Kha lioah “Pathian nih a kan pekmi a si loh, Aung San Suu Kyi nih a kan pekmi a si“ ka rak i ti sual ciammam i, mi tampi thin ka rak phawh kha ka mitthlam ah a hong cuang ṭhan. Catialtu: Perhkalh Thawng