LBC ah cun ka Lai ngai’ tiah Rev. Dr. David Van Bik nih Lai Baptist Church (LBC), Rangoon i phung a chim lio ah a rak ti. Cu lio cu Rangoon khua i Laimi kan van karh ngai lio caan a rak si. Kawlholh hmannak khua ah Laiholh tha tein kan rak hmannak le Lai sining in kan thutdirnak a hmuh tikah a lunglawmhnak a chim ko tiin kan rak ruah cio.
Atu hrawng Laica in tialmi thawngpang cachuak a karh ngai. Ramleng kan phaknak a van sau deuh i ramleng lei nih tuahmi maivan thawngpang (online news) cachuak zong a karh ngai. Kum tampi chung kan rak tuah khawh lomi asiloah tuahnak nawl kan hmuh lomi a si ruangah atu bantuk caantha kan hmuh khawhmi kha thiltha ah ruah cio a si. Asinain, rel tikah an kan ‘Laiter’ lo ngai.
Kan ngeih komi Lai biafang hmang loin Kawl biafang kha Lai cafang fonh in tialmi nih a kan doh khun. Peng le khua min, thilri le minung min pawl zeimawzat zong rel tikah theihfian khawh lomi an um len. Chin State asiloah Chin Ramkulh zong kha ‘Chin Pine’ asiloah ‘Chin Pyine’ tiin kan tial.
Maivan cachuak rel ko ah a zual khun rua ti awkin a um. Caan ngeih lo ruangah a si kho i daithlan ruang zongah a si kho thiamthiam. Asiloah, thuk deuh ruat set loin a fawizaannak tu in tuahmi a si ruangah a si kho. Maivan ahcun aho hmanh nih uk loin mah tein tuah khawh a si ruangah pumpak zalonnak kan hmannak hmun a si ruang zongah a si kho. Asiloah, belh le thlaikeo a thleidang kho rih lomi kan si ruang zongah a si kho ve.
Ram a van i thleng i caholh lei ah kan thlaici tuh a tha ngaingai. Kan i lawm cio. Nain, belh a keomi tete cu a hram in phur i thah colh lengmang ah a tha. Cu lo ah cun a kan Laiter lo lawng si loin a kan laiter dih. The Lairam Times