Kum Tampi Harsa Tak Tak In An Sak Mi Inn Fawi Zaang Tuk In An Kan Khangh Piak Hi Cu Lung A Fak Tuk Ee

SAC Ralkap Nih Ramthlo Khua An Khangh Caah Inn 20 A Ciam Cang. Chin ralkap nih kahdoh ruang ah SAC ralkap cu a thimi le aa hliammi an tam caah April ni 6, ah SAC ralkap nih Ramthlo khua an khangh, tiah theih a si.

Kalay in Hakha lei ah a rak kaimi SAC ralkap hna cu Chin ralkap nih atu le atu an kah hna caah a thimi le aa hliammi an tam ngai caah sualnak ngei lo khuami inn tu an khangh i inn tam ngai a ciam cang, tiah theih a si.

“Ramthlo ah a taapmi SAC ralkap nih Ramthlo khua an khangh caah April ni 7, zanlei suimilam 5:00 tiang ah inn 20 a ciam cang. Ramthlo Biakinn pawng ah thing-ai ponmi zong an khangh,” tiah khuami pakhat nih The Chin Post ah a chim.

SAC ralkap Falam an phak ah kan innchung thilri le a herhmi dangdang cu kan ṭhial dih hna i, ralhrial in kan zaam. Khuami a thimi le aa hliammi cu kan um hraw lo.

SAC ralkap cu hmai ah fong kho loin Chin ralkap nih an kah cuahmah ko hna. Tuzan cu Ramthlo khua ah riah dawh an si, tiah a chim chap.

SAC ralkap nih Ramthlo khua an khangh caah a kangmi inn ngeitu min cazin cu April ni 7, tiang ah a tanglei bantukin The Chin Post nih kan khawmhsuatmi a si.

1. Duh Hre

2. Van Neih Thawng

3. Tawk Luai

4. Than Hlau

5. Thawng Zel

6. Hmet Tin Hre

7. Pek To

8. Dar Thluai

9. Rem Za Mawi

10. Bawi Lian Zul

11. Thian Kam

12. Lian Nawl

13. Het Hnin

14. Za Hlei Thang

15. Hre Lian

16. Nu Lawng

17. Siang Cung

18. David Thang

19. Lian That

20. Sakremhnak inn hna an si.

April ni 7, zanlei suimilam 5:00 tiang ah SAC ralkap cu Chin ralkap nih lamhruang in an kah hna pin ah drone in bomb an thlakhnawh hna caah ralkap cheukhat cu hnu a kirmi zong an um.

Cu pinah Falam le Hakha um SAC ralkap nih miakpi in kah an bawmh hna caah Ramthlo khua kiangkap ah miakpi kuan an tla, tiah theih a si. TCP