March Thla Chung KNU Brigade 6 Hmunram Ah Voi 16 Kahdohnak A Chuak, Tualchung Mi 20,000 Leng An Zaam
KNU Brigade 6 hmunram ah March thla chung ah SAC ralkap le KNLA kar kahdohnak voi 16 a chuak i, SAC ralkap 51 an thih pin ah 17 tlaih an tong, tiah theih a si.
2023 March 1 in 31 tiang KNU Brigade 6 hmunram ah KNLA/ PDF le SAC ralkap kar kahdohnak a chuak i ralkap 51 an thi. KNLA/PDF lei in ralkap 4 nih ram le miphun ca ah an nunnak an pek ve, 12 hliamhma an pu, tiah theih a si.
SAC ralkap nih March thla chung ah vanlawng in voi 27 kahdohnak an tuah i, hriamngan in khuate cu voi 214 an kah, tiah theih a si.
Cu kahdohnak ah cacawnnak sianginn 2, phungki sianginn 3, Khrihfa biakinn 1 le tualchung mi inn 360 an rawk. Cu leng ah naupawi lio nu le kum 3 tang ngakchia telh in 33 hliamhma an pu.
Tualchung mi 9 an nunnak a liam pin ah 24,021 nih a himnak ah ralhrial in an zaam, tiah Dupalarya pengkomh nih nihin April 26 ah cathanh an chuah.