Sagaing ramṭhen, Kawlin peng ah kahdohnak um loin Kawlin Battalion Commander le amah congtu telh in Pah Kah Phah ralkap 9 cu SAC ralkap nih mei in an khangh hna caah an nunnak a liam, tiah Kawlin Pah Kah Phah sinin theih a si.
SAC ralkap cu Wanthu lei in rallam an rak sial i khuate pathum ah umhmun an khuar. Battalion Commander le amah congtupa nih an va kalhnawh hna i, SAC ralkap he an i ton caah an kulh hna i an pahnih in mei in an khangh hna.
Cu hnuah Pah Kah Phah ralkap 7 zong leilawng chung ah mei in an khangh hna. Battalion Commander pa hi KIA nih an rak thlahmi a si i, thlakhat hrawngte lawng kan sin ah a um rih,” tiah an chim.
Battalion Commander cu Pah Kah Phah nih, an pehtlaih khawh ti lo caah va chanh ding in Pah Kah Phah le Pah Lah Phah an i bawm i leilawng 3 in an va kawlnak ah SAC ralkap nih an kulh hna. Pah Kah Phah ralkap 7 zong leilawng he an khangh hna. Leilawng pahnih tu cu zen-kuan an phurh caah an khang lo, tiah theih a si.
Nunnak a liammi ralkap 9 hna an ruh cu an laak hnu ah an vui cang hna i Battalion Commander pa ruh tu cu KIA sin ah an kuat, tiah theih a si.
Battalion Commander pa hi NUG, kokek thilchuak le pawngkam zohkhenhnak zung Minister Dr. Toe Hkawng a tupa a si i a ngaihchiatnak zong amah pumpak social media ah a taar.
SAC ralkap Telegram ah Kawlin peng Hnawkone le Pepinchaung khua kar ah KIA ralkap hruaitu pakhat le Kawlin Pah Lah Phah hruaitu telh in 8 kan fimhlawm hna pin ah an meithal zong kan laakpiak hna, tiah an langhter.TCP