Hi! Keimah ka min cu Dawt Khun a si i Khun te tiah ka min din in an ka auh. A cheu nih ka fapa upa bik min in Austin nu tiah an ka auh. Fa pathum ka ngeih hna. Kum-8, kum-5, kum-4 an si hna. Pa pakhat nu pahnih an si.
Mental health problem ka ngei. Fa ka ngeih hnu in a zual. Ka fale nih maw an zual ter maw midang nih maw an zual ter ti cu ka thei lo nain, a fiang mi cu pasal le fa ka ngeih hnu in a zual ti hi si.
Ka hmet tein mi lung-hak ( strong-willed child )ka si. Falai zong ka si. Ka kum rup loin harnak tampi a tong bal ve mi ka si.
Ka backround kha cu mah vial kha va si ko sehlaw, ka chim duh bik mi cu zeiruang ah dah mah pawl hi kan chimh hna timi hi si.
Mah bantuk zalong tein ka chim ngam nak a ruang cu : minung tampi nih an mental health kong ah zalong tein bia an chim ngam lo ning ka hmuh tuk cang caah a si.
Ka derthawm bik lio caan ah, kai bochan mi hna le, a ka hnem tu ah ka ruah mi hna nih, an ka leirawi nak tampi ka ton bal. Cucaah, keicu, a ka zum i ka cung ah a honest mi hna leirawi lo ding kaa thim nak a si.
Mah bantuk ka mental health kong ka chim ruang ah a ka nih sawh tu minung thongkhat um ko hmanh-hna-seh-law, minung pahnih khat te nih keimah bia thawng in ni fatin a ṭhawn khawh ṭhan lengmang ah cun, minung thongkhat nih sawh nak cu nuam tein ka cohlang ko lai.
Mah cu ka MOTO a si. Ka cung ah midang an honest lo hmanh ah keimah honest kaa zuam lai tihi kaa seh-chih cang caah a si.
Ka chim lengmang cang bang in, mental health expert ka si lo. Mah kong ah ka cawn mi a um lo nain mental health advocate pakhat ka si.
Keimah experience lawng si loin, thinlung zawt a tuar mi, midang, caan saupi ka rak chang mi hna chung in experience zong tampi ka ngei. Cun, ka si khawh chung in research ka tuah ve. Cucaah, mah kong ah hin cun theih tawk ka theih ve ko cang rua tiah kaa ruah.
Cucaah, nan tuar mi harnak tete rak ka chim ve uh. Nan backround theih ka herh lo i nan tuanbia theih ka herh lo. Nan tuar nak tu ka chim uh, Kan chimh ve hna lai. Pakhat le khat kan i hnem hna lai. Zeitikhmanh ah kan leirawi hna lai lo. Cucu PATHIAN hmai, minung hmai ah kan kamh hna.
Laimi cu, kan hmet tein, mah le mah i dawt ( self-care ) a biapit ning kong kan rak i cawn piak bal lo. A hleice in, nu le bang cu, vale tang dor ding, nupi ṭha le nupi fim si ding lawng te cawnpiak peng mi kan si. Nihin tiang a si peng.
Nau no chan le fale zohkhenh a har ning le, fa kan ngeih hnu in zeitluk in dah kan mental health a rawk cat timi kong fak pi ceih le chim a um lo. A chim mi poh kha, hawi nak derthawm in hmuh a si.
Cucaah, kannih chan ah cun, tampin chim ko hna sih. Kan chim pah cuahmah bu ah a ṭha deuh mi environment tu kan fale caah kan ser cuahmah ve lai.
A chah tuk mi kan trauma pawl hi, pakhat hnu pakhat in kan khuai duahmah hna lai. Damnak lei ah kan kal thluahmah ve hna lai.
Mah zong healing lei ah kal cuahmah buin, fale caah a dam mi future ser ding hi ni fatin ka goal a si. Cucaah, cu bantuk goal a ngei mi nu hna nih rak ka join ve uh! Kan choi ṭi hna lai. Let’s go!
Note : Hmanthlak khi hnu lei chit mi lawng ka ngeih hna. Hmailei chit in kan don ṭhan te ko hna lai heheh! Cattialtu: Khun Te