Keimah tlaih liomi Project nih a herh a ti caah 23 May 2023 in ka umnak Delhi in ka chuak i Laitlang lei ah Ke par hoih in ka kal. Rian kong he pehtlai in Laitlang Khuate (10) leng ka tlawn hnu June 2, 2023 ah Camp Victoria lei panh in ka rak i thawh ve.
Laitlang Zophei ram ka um chung ah Lungkhar le Timit kahnak fak ngai in a rak i thok than nolh, SAC ralhrang lei nih Raldohnak Vanlawng le Hriamngan a hman tuk ruang ah CDF-Zophei kan ralkap chung in hliamtuar zong an um. Ka um ve lio a si caah Sizung an umnak ah ka va zoh ta ve hna i keimah lungchuak in an hmai te ah ka dir i thazaang peknak bia zong ka chim.
Cu ti te cun thinlung nuam lo, lungfahnak boruak karlak ah Camp Victoria Based lei ah ka rak i thawh ve. Camp ka phak hlan zaan ah hin CNA kan ralkap a ruak cu zaantim ah Camp Victoria ah rak phak pi a si i ruak vuinak program rak hman a si cang.
Internet line le phone line zong ka hman khawh lo caah ruahdamh in Camp lei cu ka rak panh. Vuichip ka rak phak ah naite i an kan liamtak mi Bawino Ngun Cung Lian (NG Lian) he lampi ah kan i tong.
USA in a rak tlung mi kan pule Thau ah Motor in a hei thlah pah hna ah a si. Lampi motor a mongh cuahmah pah cun a ka hmuh i namchan in motor a dirter i a rak tum. U Cung tiah hmaipanh le lunglawm taktak in a rak au. Namchan in ka zoh cu Ralbawi thuam he dawh taktak in Ngun Cung Lian (NG Lian) a si cu ka hmuh. Ka motor cu ka dirter colh ve i ka tum colh ve.
“U Cung, Camp ah ka rak kir than ta lai, rak caam rih ko mu tiah bia a ka beuh tak ve. Na U Edward nu (Kannu) nih Angki le thilri an kuat, Camp tu ah kan pek te ko lai ka ti. Khual lam a si caah saupi chonh loin kan tthen”.
Camp Victoria ka phak lai te ah CNA Ambulance motor pakhat namchan ngai in a rak kai ka hmuh. Hmai ah Major Thawngpi a rak thut khi ka hei hmuh. Ka motor cu ka dirter i an mah zong cu chikhat te in tiah ka hei au hnawh hna.
Major Thawngpi nih a ka hmuh bak in U Cung (Keimah nak in upa a si ko nain U Cung tiah a ka auh peng), kan Ralbawi bokhat nih nihin ah an kan liam tak than i ruak kan va dong ta lai, Camp ahcun na duh nak paoh rak lut ko law, na tlunnak ah kan rak leng te lai a ka ti. Cu ti vial cun a ka lenh tak colh ve.
Camp Victoria ka phak cu a lin ngai, ka phak in Pu Mon le Pu Htet, Pu Sui tiah bia kan i ruah len colh hna, capo hna kan chim pah. Camp ka phak bak in kan ralkap dinh caan an ngeih lo ka hmuh, linsa lak zong ah thut caan ngei loin an mah le rian cio an ttuan ka hmuh.
Khuazei maw ngai in ka ba tiah chim ngam ding le a lintuk e tiah chim ngam awk a si lo. Walkie Talkie pakhat cio an i tlaih, thawngpang kip cu tuanvo ngeitu nih pehtlai tein a chim peng caah Hnavar taktak in an Talkie cu an i tlaih peng ko hna.
Zaanriah kan ei dih in tuzaan zong ruak a phan tthan ding a si i Ruak kan hngak than ko hna lai ti a si, zeitik a phanh lai theih a si lo nain ruahdamh cun hngah top a si ko. Keimah zong cu it lo tein ka um ve.
“Khah Camp lei kan rak panh cang, chuk kan zuan cuahmah lio a si hih tiah deilei suimilam 1:00AM tluk ah Talkie biachim ka theih. Ka Hna ka hun tun, Major Thawngpi nih Lampi Ambulance chung in Camp lei thawngthanh nak a rak tuah mi kha a rak si.
Namchan in ka tho, a linh tuk caah Bawngbi tawite he ka it nain kan Pasaltha Ruak vuinak ahcun Bawngbi sau kai hruk ah a ttha lai tiah ka thil ka hun i thleng, a hmun ka phak ahcun kan ralbawi, kan ralkap hna le kan pu le vialte cu an rak dir dih cang.
Keimah a hmun ka phak hnu minute 5 tluk ah Ruak a phor mi Ambulance cu kan hram ah a rak dir. Namchan in Ralkap minung 4 hrawng nih an zuan hnawh i Biakinn ah an lut pi colh. Hohmanh lut rih hlah uh, thilri kan thleng ta lai an ti, minute 3 an rau lai lo, luh a ngah cang an ti. Kan dihlak in Namchan in kan lut hna.
Cu vial ahcun Ralbawi pakhat a dir, upat peknak an kan tuah pi, cu dih cun Pastor pakhat a hun dir, Bible relnak le Thlacamnak a tuah i cu ti te cun, kan dihlak in chuah a za cang an kan ti, Ruak cu Thlanhmun lei ah an kal pi colh, cu ti cun vuiliam colh a si ko. Ruakvui nak program kan hman caan hi minute 10 hmanh a tling hnga maw ka ti. Ka lungfahnak le ngeihchiatnak nih a ka zul tuk ve caah suimilam caan zong ka zoh manh ve ti lo.
Khua tampi ka ruat, “Ram caah nunnak pakhat ngeihchun te hmanh an kan pek piak tu kan pasaltha hna hi an ruak hmanh pei duhdim in vuiliam an si lo hi ka ti. Laimi cu thih a sunsak mi kan si, kan thih caan ah zaan khuadei Ruak aa hum mi kan si, Ruak inn ah Khrihfa hlabu kip kan sa, Bible in hnemhnak caan duhchung in hman a si.
A si nain kan ralkap, kan pasaltha hna cu an rak si ve lo. A sunglawi bik mi pekchannak, thisen nunnak an kan pek piak ko nain, kanmah bantuk in an Ruak sunglawihnak caan hmanh an ngei lo. A sunglawi tuk ding mi an ruak vuinak caan tiang in pei sacrifice an kan tuah piak chih hi timi ka hmuh”.
Cu vial ahcun ka riantuan hawi nih “U Cung, ruakvui caan te hmanh an ngei lo na ti, ralkut ah a thi mi kan pasaltha cheukhat cu, an ruak hmanh lak khawh an si lo, SAC ralhrang nih a chiahru bik mi tuahsernak in an ruak tiang pei an tuah hna cu a ka ti,” cu bia ka theih cun kan pasaltha hna sin ah ninghngal tuk hna in bia ka rak chim sual maw, upat tuk ding pei an si i, an nunnak le thisen lawng si loin, an ruakpum tiang pei maw kan caah an pek dih hi” timi ka ruat.
Camp in ka rak i thawh lai zaan ah Bawino Ngun Cung Lian (NG Lian) cu ka sin ah a rak ra. U Cung, thilri tete na ka phorh i kaalawm tuk. Keimah zong hi Raldohnak lei ahcun ka va kal ta ve lai, a si khawh ahcun tutan ka rak tlun in cun chikhat te dinhta ka duh ve, khunh an ka pek ko ahcun Delhi na sin ah ka rak ra ta ve lai. Ka U Edwardnu, Edward le Zaitha zong ka ngai tuk hna, an ngaituk hna tiah ka chimh piak ko hna aw a ka ti.
Ralkap an si caah keimah sin riah zong a duh ko nain a tha lai lo a ti i an mah riahnak ahcun hmaipanh te le lunglawm tein a kir, Mangtha U Cung, Delhi ah kan rak tlawng duak ta te ko hna lai i kan i hmu than ko lai timi bia hi voithum leng a nolh, Bye Bye kan i tuah i cu ti te cun a lawi. Hi zaan hi ka naupa NG Lian he kan i tonnak a donghnak zaan a si lai timi hrim ka ruat lo. Theih chung awk hei ttha sehlaw ka kut ka reh chih len ve ko hna.
An kan liam tak cang mi NG Lian le Van Van zong hi keimah sin ah Thla(6) an um, kan inn te in training an kai, cu caah ka nau taktak bantuk in ka zoh hna lawng si loin, kafa upabik bantuk in ka zoh ve mi hna an si. An mah zong nih an kan tlaihchannak a ngan hringhran ve.
A thaizing June 4, 2023 ah Aizawl lei panh in ka rak i thawh hi asi. Ka bat ngai caah Aizawl ah nikhat ka caam, Aizawl ka phan cang e tiah June 5, 2023 ah NG Lian cu ca ka hei kuat, Elaw U Cung, tiah ca a ka leh ve, voiding bantuk in a cakuat zong leh ti loin ka um kha a si. June 6, 2023 ah Aizawl in Delhi lei ka rak i thawh. Vanlawng cung a si caah ka phone cu flight mode in ka chiah caah zeibantuk thawngpang hmanh ka thei lo.
Zaanlei suimilam 2:15PM ah Delhi Airport kan hun phan, ka nupi le ka fale thawng ka thanh ta hna lai tiah ka phone ka hei zoh i internet line ka hun tuah colh, Kan nu ka chonh lai tiah a facebook ka hun zoh ahcun “NG Lian nih an kan liam tak” timi cu ka hmuh hi asi.
Ka celh lo, Kan nu catial mi le NG Lian hmanthlak ka zoh cu ka celh lo. U Ling (Salai Za Uk Ling) ca ka kuat, NG Lian a thi tiah ka hei chimh, namchan in a rak ka call colh ve. Vanlawng cung kan um lio a si, kan ttum taktak rih lo.
A si nain ka pawng mithmai ka zoh kho ti lo, Ngu’ngu thlak in ka ttap, U Ling nih cun, zeiti tha lungthawn rak i zuam a ka ti i a ka hnemh, ka pawng a tthu mi an lau ngai ka hmuh ko nain sum khawhnak ngei loin ka ttap taktak ko. A fak ka ti tuk caah a si. Inn ka phan, ka tlei kho lo, Office ka kai, ka tlei kho lo, nihin tiang a thli tein ka mithli a tla peng rih ko.
“NG Lian cu hringtu nih a ruak hmanh a hmu kho lo. Hringtu a nu nih a fapa NG Lian ruak don ah khua a rak phan an ka ti, nain Khua ah a ruak a tlung kho hlei lo. A riantuannak hmun ah a va kal, a si nain a fapa NG Lian ruak a hmu hlei lo. Hringtu a nu cu a fapa ruak tal ka hmu hnga maw tiah a vakvai len nain nihin tiang ruak a hmu lo”.
Ka lung ah a hun chuak “Kan pasaltha hna nih ruakvui caan an ngeih mi cu minute 10 hmanh a rau lo, tiah lungnuam lo ngai in ka chim lio ah ka hawipa nih “U Cung ruakvui caan cu chim lo, ruak lak khawh lo in le ruak humh awk um loin, SAC ralhrang nih tuahmi an tam dahkaw” a ka timi kha.
Ram caah, Ram zalennak, Miphun luatnak caah tiah an nunnak le thisen lawng an thap lo, An ruakpum tiang in pe maw Sacrifice an tuah hi” ka ti. Minung sinak in tuar a har ko, thisen khat chungkhar, nulepa, Ule nau caah a hartuk lai timi kaa fiangtuk, Thisen le nunnak lawng si loin, an zeizong te, an saduhthah le chungmang vialte pin ah an ruakpum tiang in kan miphun le ram caah an pek dih.
Note: Upat peknak he ka tial duak ve mi asi. Ruakvui nak caan le Ruakvui ningcang ka soisel nak a si lo. Salai Cung Dawt