Nigeria ram khuate pakhat ah meithal kah ruang ah minung 50 nak tlawm lo an nunnak a liam, tiah theih a si.
Nigeria ram laifang Benue ramkulh Umogidi khua ah kahdohnak voi hnih a chuak i minung tam ngai an thi.
April ni 5, ah meithal kahnak a chuak i, khuami 3 an nunnak a liam. Cu hnu ah a bu in thahnawnnak a chuak ṭhan i minung 47 nak tlawm lo an nunnak a liam, tiah theih a si.
Benue ramkulh palik nih Umogidi khua ah a bu in thahnawnnak a cangmi hi a dikmi a si ko. Bazar hmun pakhat ah mibu in an um lioah misual phu nih an kah hna, tiah an langhter.
Voi hnih tiang kahdohnak a cangmi hi zeiruang ah dah a si ti cu kan hngal rih lo nain kahdohnak voihnih a chuakmi hi a voi hnih ning in pehtlaihnak a ngei ko, tiah nawlngeitu hna nih an zumh.
Cu Kahdohnak kong ah mizei bu hmanh nih ṭuanvo an la rih lo. Palik tu nih cun Caw le Na kong ah lei rianṭuantu hna karlak ah buainak a um men lai tiah an zumh.
Naite zong ah lei rianṭuantu hna nih Caw le Na cu leikuang ah an congh hna caah buainak a rak chuak bal cang, tiah theih a si.
Benue ramkulh cu Nigeria ramchung ah cinthlaknak rian biatak tein a ṭuan i eidin tampi a chuahnak hmun a si ko nain a luancia kum ah buaibainak a rak chuah caah cinthlakmi hna zong an zor ngaingai, tiah theih a si.TCP