Kan theih cio bang in Mizoram, Baktawng khua i Pu Ziona cu vawlei cungah chungkhar nganbik a dirhtu a si. Guinness World Records le World Record Academy zong nih chungkhar nganbik tiah an fehter kum 2011 ah. Nupi 39 a nei i tufa 150 leng a nei kho. Upa C.Lalrinthanga a chimning ahcun atu ah an chungkhar dihlak hi 196 an si.
Pu Ziona hi pa men lo cu a rak si ve ko. Mizoram ah khin Wikipedia nih an konglam a ttialmi minung pa 5 hrawng lawng an um nain Pu Ziona konglam hi tam ngai in Wikipedia hmanh nih a ttial ve. Chinmi chung le bang cun Wikipedia nih a konglam an ttialmi pa cu Henry Van Thio lawnglawng hi a si ko lai.
Pu Ziona cu kum 2021, June thla ni 21 a thi nain atu tiang hi a khuami nih a chuahni cu sunglawi tuk le ropui tuk in an lawmhpiak peng rih ko. A ropui ning khi video ah hei zoh uh law nan hmuh ve ko lai. Baktawng khua hi inn 550 hrawng lawng an si nain thilpuan dawhdawh uniform in an i hruk kho i sehlei thilri tha2 zong an hmang kho fawn. An men lo. Pu Ziona chuah ni lawmhnak ahhin sia 1, vok 1 le caw pa 5 an thah hna.
A phaisa in tuak ahcun ting 3 le thongsawmruk leng a dih, India phaisa in. Atu i an i pumhnak certual zong khi Pu Ziona nih vawlei cawhnak seh tel lo bak in a rak cawhpi mi hna a si. A men hrim2 lo. Pu Ziona hi Khrihfa buu a nei ve. A pu nih a rak dirhmi Khrihfa buu “Chhuanthar Kohhran” a zoh khenhtu a si. Annih zumhnak cu a tawinak cun “Second coming” kha atu kan nunchung bak ah kan teep lai tihi a si. A video donghlei ah Upa C. Lalrinthanga, biachim mi zong khi tling deuh in ngaih khawh a si ko.
Khrihfa nih cun nupi pakhat cung neih bak lo ding tiah kan pom/zulh lio ah Pu Ziona cu nupi 39 leng a nei nain Mizoram pumpi nih an dawt i a khuami le a Khrihfa bu le bang nih cun an upat i an tihzah tuk leng ah Kumchiar tein a chuahni cu sunglawi tuk in le ropui tak in an lawmhpiak lengmang ko. Amah a thih hnu ah a fapa le pa 2 zongnih an Khrihfa buu ah chairman an ttuan veve. Pa men lo Pu Ziona a si ko. Inn dot 7 hrawng ngan tak in a sak tami zong a lang ko khi. Saya Van Tum