<

Kan vawlei khua caan si ning zoh tikah, Jesuh nih, “Kutka bi chung ah cun lut tuah u, zeitintiah Hell ah a kal mi lam cu a kau i mi tampi nih an zulh. Nunnak a phan mi lam cu a har i a kutka cu a bi i a hmu mi cu tlawmte lawng an si (Matt.7:13-14),” tiah zultu a bia a rohtak mi hna a tling duahmah tihi al awk tha lo.

Nihin kan vawlei milu rel ah Khrihfa kan tam bik kan ti ko, nain a karhlei kan si lo. A milurel in kan chilh hna nain kan karh lo, kan tum. Atu lio ah a karh bik mi hi “biaknak ngei lo” an si. Vawlei hi nuamhnak par tlanhnak ram a si bantukin titsa pum duhnak zulh in nun kan hman caah chunglei thlarau duhnak kan zul duh ti lo. Duhthimnak kan ngei kan ti, covo (rights) kan ngei kan ti i cu hmang cun kan cavei cio.

Naihrawng Facebook le News pical cahmai ah a khat bik mi cu US ram, Pennsylvania ramkulh hrambunh SantanCo cawlcanghnak le After School Satan Club kong a si. Vawlei killi in The Satanic Tempel (TST) chungtel hi 700,000 lengkai an si an ti. Kan hnu April dih lai ahkhan Boston khua zapi hmunhma ah tuah tawn mi TST cawlcanghnak cu khuabawi Michelle Wu nih a khampiak hna caah serhleih duhlo langhternak ah civui an tuah.

Minung 800 fai an chuak kho i Khrihfa Baibal zong zapi hmuhhngan ah an thleh, an tau dih. Hi pin ah, TST nih a ngeih mi ngakchia cawnpiaknak After School Satan Club le Saucon Valley School District tlangchuah ruangah buainak a linsa. After School Satan Club tangum ngakchia pawl hmanrua vialte nan khap hna tiah, The American Civil Liberties Union (ACLU) nih tlang an chuahpi hna hi a si. Biaceihtu nih phung ning tein Satan Club nih hman a herh mi ngakchia hmanrua hmanter dingin biachahnak a tuah.

Anmah (TST) lei nih cun “Ngakchia zohkhenhnak le kan tuah mi ah siseh, puitling minung hna sin cawlcanghnak ah siseh, chungtel si awk ah lemsoinak kan tuah mi a um lo. Ningtak hngalhnak (scientific) he pehtlaiin kan cawnpiak hna, biaknak kan hnursuang lo an ti.” Atu an minung thazang hi 700,000 lengkai an si cang. An karh cak ngaingai. Civui an ngeih caan ah siseh, maivan chung zong in chawlehthalnak an tuah. An tangka lutchuak a tam.

Annih cu nunnak hi a nuamh khawh chung nuam in hman ding tihi an tlaihtleng a si. Anmah lawng an si lo, nihin vawlei ah Khrihfa biaknak hlawt riangmang in biaknak ngei lo an karh tuk. Khrihfa chungkhar in a rak thanglian mi a si ko nain, biaknak ngei lo ah aa chuah mi an tampi. Cucaah Khrihfa biakinn hi kum fatin 1,000 cuang lengmang an zuar siloah khar ti si. Phun dang in kan chim ahcun, muihnak chan ah kan lut cang i zultu thar ser in Khrihfabu dirh mi nakin dirh cia mi Khrihfabu vaivuanh a tam deuh cang.

Laimi zong hi khi dirhmun kan phan te lai lo ti chim awk tha hlah! Atu kan dirhmun hmanh hi zoh ulaw, upa cu chim lo Mino biakinn phan hmanh kan tlawm cu mu! Hi a si caah nihin kan cawk mi biakinn pawl hi kan fale chan zeizat tiang khi dek a hei hnguh te hna hnga? Khrihfa chungkhar in i thanlianhpi sawhsawh mi Khrihfa sinak i tlaih peng bu cun kan rau lai lo.

Khrihfa sinak nih mi a khamh lo, zumtu taktak sinak lawng in vanram co khawh a si tihi hngalhfian a hau. Cucaah Paul nih, “Atu kan nikhua hi caan chia a si caah, caan tha nan hmuh mi paohpaoh kha tha tein hman i zuam u,” (Ef.5:16) tiah, a kan cahtak bantukin kanmah pumpak si usih, kan fale nun tiang khi zoh in zeitluk fek in dah Pathian kan i tlaih tihi, kan khuacaan he i hal lo awk tha lo. Salai C. Twintwin

 

 

By admin

Leave a Reply

Your email address will not be published. Required fields are marked *