Khampat Kahdohnak Ruangah Khampat Khuami Minung 2000 Hrawng India Ram Lei Ah An Zaam
Sagaing ramṭhen, Tamu pengkomh, Khampat ah nizan July 23 in SAC ralkap le Tamu PDF kar fak ngai in kahdohnak a chuah ruangah tualchung mi 2000 tluk cu India ram lei ah an zaam, tiah tualchung mi nih an chim.
Khampat no.1 sang ah a ummi palik sakhan cu Tamu PDF nih an kah hnu ah kaphnih kar kahdohnak a fak . SAC ralkap nih minung thazaang an chap caah nihin July 24 zong ah kahdohnak a chuak ṭhan, tiah tualchung mi nih an chim.
Kahdohnak a chuah ruangah no.1 sang um mi hna le Kanaan khuami minung 2000 hrawng cu India ram lei ah an zaam, tiah tualchung mi pakhat nih RFA ah a chim.
SAC ralkap nih uknak an laak thawk in nihin tiangah tutan Khampat i kahdohnak hi a voi khatnak a si. Nizaan July 23, zaan zongah Khampat khuachung i hriamngan a tlak ruangah kum 23 tluk Chin pa pakhat cu a nunnak a liam, tiah tualchung mi nih an chim.
Khampat Ah Kahdohnak A Fak Kho, Khuami An Lungre A Thei
July 22 zaan suimilam 8:00pm hrawng khan Kalay peng Khampat khua ah a um mi SAC ralkap cu mipi ralkap phufonh nih an kah hna i CNDF in pakhat hliamtuar a tuar.
SAC kah mi bomb nih No.1 i RC biakinn pawng ah a um mi Pu Nga Nga a fapa cu a khen caah a nunnak a liam tiah theih a si.
Zahan Khampat ralhrang sakhan mipi ralkap nih an kahnak ah ralhrang nih tonghmangloin hriamnam ngan an kah caah Khampat No. 1 RC biakinn pawng ummi, Pu Nga Nga fapa hniang bik cu bomb nih a khen caah a nunnak a liam. Tantakmi chungkhar Bawipa nih in hnem ko hna seh!
SAC ralkap lei a thi le hliamtuar kong theih khawh a si lo. Kalay lei in SAC ralkap an ra tiah thawng a len caah Khampat khuami hna cu thinphang le lungrethei in an um tiah theih a si.Thlacamnak in bawm cio hna usih!
Hmanthlak: Bomb nih a khen mi Pu Nga Nga te inn le nunnak a liam mi a fapa. TCP