A tang thawngpang pali hna hi nizan kawlram thawngpang tampi lak ah mipi lungthin a latu bik mi hna cu an si. Cu thawngpang pali hna cu The Chin Post nih a rak langhter mi an si i, pakhat hnu pakhat a tang ah hin ka vun chiah hna.
1. Gangaw Ah Rallam Sialtu SAC Ralkap Le PDF Kar I Dohnak Ah SAC Ralkap 4 An Thi, PDF 2 Nunnak Liam. Magway ramṭhen, Gangaw peng Min khua in a chuakmi SAC ralkap hna cu an hnu zulh in PDF nih an doh hna.
Cu dohnak ah cun PDF lei in pahkahphah Naga Ngyinaung phu hruaitu U Zaw Zaw le ralkap Pyi Phyo an nunnak a liam i SAC ralkap lei in 4 an thi tiah pahkahphah Naga Ngyinaung phu in ṭuanvo ngeitu pakhat nih a chim.
March ni 1, ah Gangaw khahlahyiah 50 in a chuakmi SAC ralkap hna cu Min khua lei ah rallam sial in an luh lioah tualchung hriamtlai phu hna nih an hnulei in a thli tein an doh hna caah SAC ralkap 2 an thi tiah theih a si.
Rallam sialtu SAC ralkap hna cu March ni 2 ah Min palik sakhan in Gangaw peng lei an panh ah pahkahphah Naga Ngyinaung phu nih an doh ṭhan hna, kaphnih kar kahdohnak ruang ah tualchung hriamtlai Naga Ngyinaung phu in hruaitu U Zaw Zaw le ralkap Pyi Phyo an nunnak a liam, SAC ralkapvlei in minung 2 an thi tiah theih a si.
“SAC ralkap Khahlahyiah 50 nih Gangaw in Min khua lei ah rallam an sial hi zarh khat leng a si cang, Min khua in Gangaw lei an kir ah pahkahphah Naga Ngyinaung nih an hnu in an doh hna i kaphnih kar kahdohnak a chuah hi a si, kanmah lei in hmaikal 2 an nunnak a liam” tiah pahkahphah Naga Ngyinaung phu in ṭuanvo ngeitu pakhat nih a chim.
2. Matupi Ah Tanghra Camipuai A Tuah Ding Siangngakchia Hna Cu SAC Ralbawi Nih Kyats 15,000 Cio A Pek Hna. Matupi khuachung um tanghra camipuai a tuahtu ding siangngakchia hna cu SAC ralbawi byuhahmu Ye Kyaw nih minung pakhat ah kyats 15,000 a pek hna tiah theih a si.
Chin ramkulh, Matupi ah SAC kuttang um tanghra camipuai cu a ralaimi March ni 8 in an thawk cang lai tiah kan theih. Matupi khuachung cu February ni 6 in tanghra camipuai an tuahchung vialte khualtlung cazin caankel tein an check lai tiah theih a si.
Nai tan zong ah SAC ralkap nih tanghra camipuai tuah chung ah Matupi peng lam hna cu an phih lai tiah thawngpang a leng cang. Nizan zaanṭim ah Matupi khuachung ah SAC ralkap leilawng hna cu khuachung ah an i chok len, zeithil a can cu khuami nih an thei lo. Khuami hna nih an ruahnak ah cun tualchung hriamtlai phu nih drone an thlah caah a si kho tiah an chim.
Matupi khuachung ah eiding le facang an donghcahnak kong ah SAC ralkap lei in zeihmanh tawlrelnak a um lo caah khrihfabu nih khuachung ah facang a luhkhawnak hnga an tawlrel.
Matupi khuachung a phan tharmi pengkomh khuabawi U Kyaw Ngyein nih cun “kanmah ca cu vanlawng in riahcaw kan kuat lai, nanmah mipi pawl hi ei awk ngei loin nan um lai” tiah facang cah ding in GAD zung a phanmi rian ngeitu hna cu hrocer in a raak hna tiah theih a si.
3. Mandalay, Saedawkyi Ti Luannak Zirhpiakmi Ah Lu Tanmi Ruak An Hmuh. Mandalay, Patheinkyi pengchung Saedawkyi ti luannak zirhpiakmi ah lu tanmi pa pakhat a ruak kan hmuh, a ruak cu siizung ah kan kalpi tiah mi bawmchantu phu hna sin in theih a si.
Mi pa pakhat a ruak cu March ni 4, zan ah kan hmuh i, March ni 5 zinglei ah kan laak tiah an chim. “A ruak cu ti cung ah a rak i vuan, kan laak khawh hnu ah siizung ah kan kuat” tiah mi ruak latu ah aa tel mi, mi bawmchantu phu chungtel in ṭuanvo ngeitu pakhat nih a chim. Ruak an hmuhnak Saedawkyi ti luannak zerhpiakmi cu Madaya in Patheinkyi lei ah a luangmi a si.
4. Myinmu Peng Khua Pakhat Ah Tualchung Mi Tlaih Le Thah An Tong. Sagaing ramṭhen, Myinmu peng Latkapin khua cu SAC ralkap nih an luhhnawh i khuami tampi tlaih in thah dawh an si tiah tualchung mi hna nih an chim.
March nib5, zanlei suimilam 5:00PM hrawng in Myinmu peng Latkapin khua cu SAC ralkap nih rallam hmun hnih ah sial in meithal thlahpah in an luhhnawh, tualchung mi zaam manh loin minung 200 hrawng an i hreng i SAC ralkap nih an tlaih hna tiah theih a si.
Nihin March ni 6, zinglei ah SAC ralkap nih an tlaihmi hna chung in minung 3 cu thah an tong i khuachung inn hnih zong an khangh chih. Tualchung mi cheukhat zong hi a bubu in thah ton dawh an si ko tiah theih a si.
“Tlaih a tongmi hi minung 200 hrawng an si cu chung ah pa cu an thim hna i an thah hna tiah kan theih. Tutan ah rallam sialtu SAC ralkap hi Tadai khua tualchung mi 17 a rak thattu phu an si.
Tualchung mi a zaam khomi zong an um i minung zeizah thah an ton cu fiang tein theih a si rih lo, SAC ralkap hna zong khuachung in an chuah rih lo, tualchung mi mizeimaw cu hliamhna tuar zong an um” tiah tualchung mi pakhat nih a chim.
Sagaing peng Tadai khua cu a luancia March ni 2 lioah SAC ralkap nih an rak luhhnawh i tualchung mi minung 17 cu ralphaw caah tlaih in nu 3 cu an sualpi hna hnu ah an thah hna i pa 14 zong fakt uk in an hrem hna hnu ah an rak thah hna tiah theih a si.TCP