Myanmar Ralzam Pakhat Cu Lainawn Ruangah A Nunchung Thongthlak Ding In Bia An Ceihpiak. Mizoram Champhai peng, Khawbung ah Myanmar ralzam pakhat cu lainawn ruangah a nunchung thonghtlak ding in biaceihzung nih bia an ceihpiak.
Champhai Cable Network nih a langhter ning ah, Hrang Than Ce(kum 38), Hnahthial, Falam peng, Mizoram Khawbung khua i aa dor lio mi cu, Myanmar mi Ngo Khan Do thattu ah puh a si i, fianhnak phunphun an hmuh hnu ah biaceihzung nih sual a phawt.
July 28, 2023 ah khan biaceihzung nih dantatnak an pek mi cu an thanh i, a nunchung thongtlak ding le rianhrang ṭuan lengah Phaisa Rs. 10,000 liam ding in dan an tat. Phaisa hi a liam khawh lo ahcun thla nih thongthlak chap a si lai.
Cupinah a thah mi ruak hlohhral ding in timhtuahnak a ngei ruangah kum thum thongthlak chap ding le phaisa Rs. 5000 liam ding in dantat chap a si. Phaisa ₹ 5000 hi a liam khawh lo ahcun thla hnih thongthlak chap a si lai.
Nunchung thongthlak ding in dantat mi Hrang Than Ce nih hin nikum 2022 ah khan Ngo Khan Do sin in thing-ahnak seh Rs. 35,000 man a rak cawk. ₹ 20,000 a pek i, a tang mi cu a bat. Ngo Khan Do cu a luancia August 13, 2022 ah khan leiba va cawh dingin Hrang Than Ce inn ah a va kal i, cu lio ah cun Hrang Than Ce nih sobul in thilak a rak tuk.
A thah hnu ah a ruak cu thlalangawng in a hlonh i, hor ah a thuh. A cawlcanghning cu mithmutu an um rua tiah a ruah ruangah Khawbung zatlang hruaitu hna sinah aa pe i, Dungtlang palik nih an rak tlaih. The Chin Post