Sagaing ramthen , Kani peng , Monywa le Ya Gyi lam meng tung 28 zawn may 31 zinglei suimilam 11:00 am ah khan SAC ralkap nih helicopter hmang a kah hna theih a si.
A vun kap tu helicopter hi Monywa thlangchak lei ah a ummi ralkap sakhan in a vun ra mi a si I, tualchungmi hna nih an thawngpang an theih in an zaam colh ve hna caah a hliammi le a thimi cu an um hna lo.
“A hohmanh a thimi cu a um hna lo , a voi hnihnak a vun ra than sual lai ti an phan ruang ah khuachung cu hohmanh nih an naih ngam rih hna lo , zeiruang ah dah a tu bantukin kahdohnak um loin helicopter in a vun kah hna hi a ruang theih a si rih lo , a pawngkam ah hin kahdohnak zeihmanh a um lo tiah khuami hna nih an chim theih a si.
Helicopter nih a cun kah ah hin lam pawng I a ummi dawr hna cu hmuitinh in a kah kong le khuami hna a himnak ah an zaam manh hna kong theih a si.
Kani peng Pauk Inn Myiang khua zong Mi 35 in a rak kah caah a rawkmi inn cheukhat zong a um hna. KLG in rianngeitu pakhat nih “Mi 35 in kahdohnak a tuah zeibantuk kahdohnak zong a um fawn lo , phone line pawl zong an phih hna tiah a chim theih a si.