Kanbalu Ah SAC Ralkap Nih Tualchung Mi 10 Ralphaw Ca Ah An Tlaih Hna Pin Ah Inn An Khanghpiak Hna Caah 10,000 Leng Nih Ral An Hrial
Sagaing ramṭhen, Kanbalu peng chung ah SAC ralkap nih tualchung mi 10 cu ralphaw ca ah an tlaih hna pin ah khua 12 ah inn an khanghpiak hna caah tualchung mi 10,000 leng ralhrial dirhmun an phan tiah Kyunhla cawlcanghnak a tuahtu phu in ṭuanvo ngeitu pakhat nih a chim.
April 27, zanlei suimilam 3:30 hrawng ah Kanbalu peng Malay ṭaitnay chung um Sakyin khua cu SAC ralkap nih hriamngan in an kah hnu ah khuachung ah lut in tualchung mi 10 tlaih in rallam an sialnak hmun ah ralphaw ca ah an i kalpi hna tiah theih a si.
“Rallam sialtu SAC ralkap hna cu Tayawkai khua an phan, khuachung inn zong an khanghpiak hna caah tualchung mi hna cu ral an hrial, April 28 tiang ah tlaih a tongmi 10 cu an thlah rih hna lo” tiah Kyunhla cawlcanghnak a tuahtu phu in ṭuanvo ngeitu pakhat nih cun a chim.
SAC ralkap nih Pazikyi khua, Chaungta, Maymon, Laydwinsin, Htwntaw, Mezataw, Chaungshi, Myattamon, Tayawkai, Yashin, Bukone, Shwepyilin khua tiin khua 12 ah tualchung mi hna an umnak inn khanghpiak in atu tiang rallam an sial peng rih caah khuami 10,000 leng cu mah umnak hmun chuahtak in ralhrial dirhmun an phan tiah theih a si.