KAN ȚAH LIO A SI. Ram dawtu pasalțha hna cu ngeihchun nunnak pakhat te thap in ram caah ral an do lio.Ral dotu kan pasalțha hna hi fimnak capar kai lio an si hna. Chungkhar nih bochanmi le zohthlami fadawt lawngte an si.
Cheukhat fadawt hna cu pumtling lo ah an i chuah.Cheukhat fadawt hna cu zohngam ti lo in an ruak nih a rak kan phanh.Cheukhat hna cu an ruak hmanh lakkhawh an si hna lo ee
Kan ralkap pawl an temtuarning, pumpek nunthap in ram caah an i pekchanhning ruah ah hmaikhah ding an si lo … ram hrinfa pakhat a si ve ko mi nihcun
Pathian lamhruainak thawngin kan fapa Vanvan a paamnak hmun kan phankho, an paamnak hmun hi ralhrang umnak he aa naih-taktaknak hmun, lam cungah a si, zeitluk indah an ral a țhat i ram caah an nun an i pek !
Ka sining le ka fapa sining ka ep-chun tikah ram hrinfa ciocio ka sinak ah ka fapa hmai ka khap lo tuk. Ralțha ka fapa, nawlngai ka fapa kan in philhkho hrimhrim lai lo, nang cu ram le miphun caah “ Ram Dawtu Pasalțha” na si.
Kan miphun nih thisen le nunnak in tuanbia kan tial lio … “KAN ȚAH LIO” a si. Mitthli he thlaici a tuhmi nih, lunglawmh aunak he an zun lai; Ṭah buin thlaici aa phorhmi hna nih lunglawmhnak hlasa le facang phal i put in an ra kir lai! Salm 126:5-6