INDIANAPOLIS, Feb. 20, 2023 — Laitlai unau Chin Miphun tambik kan umnak Indianapolis um Pu Elaisa Vahnie, Burmese American Community Institute (BACI) hruaitu cu International Center nih tuahmi kum 50 chungah a minthang bik vawleicung hruaitu 50 a thimmi ah telh a si. Amah hruainak le papeknak thawng in Indiana State zong vawleicung huap in mi nih an theih khun nak a si, tiah tawlreltu hna nih an thangtthat.
Laksawng a hmuhmi kong he pehtlai in Voice of America (VOA) biahalnak an tuahmi ah Pu Elaisa nih hitihin a chim, “US phan Kawlrammi hna tthathnemnak ca lawngah si loin ramchung democracy, zalonnak le tthanchonak tbk. zong ah lungrual tein rianttuantti kan duh”, tiah a ti. “Atutan US congress nih Burma Act (2022) sernak zong hi kan zapi lungrual tein kan ttuantti hna caah a si,” tiah a peh.
US phan Kawlrammi tampi hna lakah atu bantuk in laitlai kan unau a simi Pu Elaisa nih vawleicung huap in (international level) hruaitu min tthatnak a hmuh nak kong he pehtlai in Indiana aiawh in Republican hluttaw Palai a simi Senator Todd Young nih cun, “Amah Elaisa Vahnie kong a theimi hna caah cu khuaruahhar tuk ding a si lem lo, Elaisa cu US phan Kawlrammi hna ca lawngah si loin Indiana ca zong ah upat le zohchunhawktlak kan ingeihchunmi a si”, tiah a ti.
Todd Young hi US Senate Hluttaw ah ramlenglei pehtlaihnak committee chungtel a si lengah atu lio Kawlram kongkau he pethlaih in fakpi in rian a ttuanmi a si. Burma Act (2022) hi hluttaw ah zapi nih hnatlaknak a ngeih khawh nakhnga Pu Elaisa telh in mi tampi he rian a ttuanttimi a si.
Dr. Ro Ding, BACI Board of Directors lutlai, zong nih, “BACI kan dirhka in nihinni tiang dingfel te le zaanghleicawi in ram le miphung caah rian a ttuannak cungah le hruaitu ttha lungput a ngeih ruangah hi bantuk in mintthatnak a hmuh caah kan lawmpi tuk,” tiah a ti.
Pu Elaisa Vahnie cu Chin ralzaam hna UN kan lut khawhnak ding caah US kan phan khawhnak ding caah aluanchiami kum 25 hrawngin biatak tein arak tuautu kan bochanmi kan pa, kan miphun hruaitu pakhat a si. Zasang Cinzah