Kan Chinram Khualipi Hakha I Thil Tlungmi Cu Kan Mipi Caah Lungrawk Tak Tak Bak A Si
Kawl Lei In Facang Man A Kai Caah Hakha Ah Facang Man A Kai Ngai. Chin ramkulh, Hakha ah facang tun khat ah kyats 60,000 a rak simi atu ah kyats 70,000 a phan, tiah theih a si.
Kawl lei in facang man a kai tuk caah Chin ramkulh khua tampi ah facang man a kai ngai. A hlan ah Pawsan hmui (ပေါ်ဆန်မွှေး)tun khat ah Kyats 90,000 hrawng a simi cu 110,000 in 115,000 kar a phan i, ARB Kaanan hmui (ကာနန်မွှေး) tun khat ah Kyats 70,000 a rak simi cu 80,000 in kan zuar cang, tiah Hakha dawr ngeitu pakhat nih The Chin Post ah a chim.
ARB Kaanan tun khat ah Kyats 60,000 a rak si i atu ahcun 70,000 in kan zuar, cu hmanh ah kawl lei facang man he tuak ahcun a miak a um lo tluk a si. ARB Hmawbi zong 60,000 hrawng a rak si nain atu cu 70,000 a phan cang, tiah a chim.
ARB Ayeyamin tun khat ah 70,000 hrawng a rak simi cu 80,000 a phan i, ARB Shwetoe tun khat ah Kyats 60,000 hrawng zong 70,000 ah an kai cang. Vorawl ca lawnglawng hi tun khat ah Kyats 40,000 hrawng a si, tiah theih a si. Tualchung mi pakhat nih, “Nikum ah chiti pung khat ah Kyats 50,000 hrawng a simi zong 140,000 a phan cang.
Atu bantuk hin facang man le chiti man an kai lengmang i eidin dang zong an kai rih a si ahcun zapi zaran cu zingzan kan khuasak tintuknak ca a har ko,” tiah The Chin Post ah a chim. SAC nih nawlngeihnak an laak hnu in Chin ramkulh ah facang le a dangdang eidin thilri man tam tuk a kai, tiah tualchung mi pakhat nih a chim.TCP
