Laitlang Kai Aa Timmi SAC Ralkap Leilawng 4 Taingen Khua Ah An Riak. Nihin April 18, zinglei ah SAC ralkap leilawng nganmi 4 cu Kalaymyo in Laitlang lei ah an kai. SAC ralkap hna cu chunhnu suimilam 3:00 hrawng ah Tedim peng Taingen khua sianginn kam ah umhmun khuar in riah an i tim tiah theih a si.
Tedim peng Taingen khua hi Tedim, Falam le Hakha kalnak lamtonnak a si i, thaizing khoika lei hoih in kal an i timh cu theih a si rih lo. SAC Ralkap Leilawng Bomb Puahhnawhnak Ah Saihpra Khuami 1 Nunnak Liam, 6 Hliam An Tuar.
Kachin ramkulh, Hpakant lei kalnak lam cung ah a ummi Saihpra khuami a tlaitu SAC ralkap le an leilawng cu bomb puahhnawh an ton caah khuami 1 a nunnak a liam i, 6 hliamhma fak ngai an pu, tiah theih a si.
SAC ralkap cu April 18, zing suimilam 5:00 hrawng ah Saihpra khua ah an lut i, suimilam 9:30 hrawng ah nu he pa he 50 hrawng an tlaih hna i, ke 12 ngei leilawng 2 le Landcruiser 1 in an kalpi hna. Saihpra khua lonh an phak ah KIA nih SAC ralkap cu bomb in an puahhnawh hi a si, tiah Saihpra khuami pakhat nih a chim.
“Kan khua pawngte ah KIA nih bomb in an puahhnawh hna hi a si. SAC ralkap nih an tlaihmi khuami hna cu anmah ralkap he cawhhrup in an chiah hna i, cucu KIA nih an hngalh lo ruang ah bomb in an puahhnawh hna hi a si,” tiah a chim.
KIA nih bomb in an puahhnawh hna hnuah kaphnih kar kahdohnak a chuak i, kum 28 tluk pa khat a nunnak a liam pin ah kum 14 ngakchia pakhat zong fak tuk in aa hliam caah a nunnak kong ah thinphang a si ko, tiah theih a si.TCP